Եթե չլինի լեզուն, չեն լինի հայերը. Տիգրան Համասյան

Անվանի դաշնակահար Տիգրան Համասյանը փաստում է՝ աշխատում է տարբեր օտարազգի երաժիշտների հետ, և նրանցից յուրաքանչյուրը տարբեր կերպ է ընկալում հայկական երաժշտությունը: «Թումո» ստեղծարար տեխնոլոգիաների կենտրոնում ապրիլի 25-ին անցկացվող Երաժշտական համաժողովի ընթացքում Համասյանը խոսեց հայկական երաժշտության կարևորության մասին:

«Արդեն մի քանի տարի է՝ օտարազգիների հետ եմ երաժշտություն նվագում: Նրանք էլ հետաքրքիր ձևով են ընկալում, համագործակցությունը նոր բան է բերում: Բնականաբար, հայկական ժողովրդական երաժշտությունը որպես էկզոտիկ բան են ընկալում: Իրենք չեն կարող ընկալել այնպես, ինչպես մենք ենք ընկալում»,- «Արմենպրես»-ի փոխանցմամբ՝ նշեց Տիգրան Համասյանը:

Նրա խոսքով՝ առաջնային հայկական երաժշտության մեջ մեղեդին է, մեղեդու կառուցվածքը: «Ինձ թվում է, որ լեզուն է, որ դարձնում է երգը հայկական, եթե չլինի լեզուն, չեն լինի հայեր»,- ընդգծեց Համասյանը:

Երաժշտական համաժողովի ընթացքում Տիգրան Համասյանը և երգչուհի Լիլիթ Պիպոյանը հանդես եկան էքսպրոմտով:

«Թումո» ստեղծարար տեխնոլոգիաների կենտրոնում ապրիլի 25-ին անցկացվեց Երաժշտական համաժողով, որին մասնակցում էին Սերժ Թանկյանը, Տիգրան Մանսուրյանը, Տիգրան Համասյանը, Լիլիթ Պիպոյանը: System of a Down խմբի մենակատար Սերժ Թանկյանի գլխավորությամբ անցկացվող հանդիպման ժամանակ տեղի էին ունենում քննարկումներ հայկական երաժշտության ինքնության և տարբեր մոտեցումների մասին: