«Ապակե կախազարդը» ֆիլմն արժանացել է «Ոսկե Ռեմմի» մրցանակին

Հյուսթոնի միջազգային 48-րդ կիոփառատոնում կինոռեժիսորներ Նարինե Մկրտչյանի և Արսեն Ազատյանի «Ապակե կախազարդը» գեղարվեստական լիամետրաժ ֆիլմն արժանացել է «Ոսկե Ռեմմի» մրցանակին (Golden Remmi Award)՝ լավագույն դրամայի համար։ Ինչպես «Արմենպրես»-ին տեղեկացրին ֆիլմի հեղինակները, փառատոնն անցկացվել է ապրիլի 10-19-ը:

«Հյուսթոնի միջազգային 48-րդ կիոփառատոնը հիմնադրվել է 1961թ. և համարվում է Միացյալ Նահանգների երեք խոշոր փառատոններից մեկը։ Այս փառատոնն առանձնանում է նրանով, որ այստեղ ներկայացվում են արվեստի ֆիլմեր։ Իսկ ժյուրին և փառատոնի կազմը բացառապես կինոռեժիսորներ են։ Այս փառատոնին ժամանակին մասնակցել են և արժանացել նույն մրցանակին Ֆրենսիս Ֆորդ Կոպոլան, Սթիվեն Սփիլբերգը, Ջորջ Լուկասը, Քոին եղբայրները, Էնգ Լին, Դեյվիդ Լինչը և այլ ճանաչված կինոռեժիսորներ»,- տեղեկացրին Նարինե Մկրտչյանը և Արսեն Ազատյանը:

«Ապակե կախազարդը» մինչ այս մասնակցել էր Բուսանի, Կալկաթայի, Մոսկվայի, Մոնրեալի և այլ միջազգային կինոփառատոններին։ Այժմ Նարինե Մկրտչյանը և Արսեն Ազատյանն շարունակում են իրենց աշխատանքը Հայոց ցեղասպանությանը նվիրված «Դաշտը» լիամետրաժ գեղարվեստական ֆիլմի վրա՝ ֆրանսիական և նորվեգական արտադրողների հետ։