«Հրապարակ». ՀԽ անդամներին պետք է ազատ արձակել. Աշոտ Աղաբաբյան

Հիմնադիր խորհրդարանի անդամների ձերբակալությունը շատերի կողմից որակվեց իբրեւ նրանց նկատմամբ քաղաքական հետապնդում: Իշխանության ներկայացուցիչներն իրենց մեկնաբանություններով առանձնապես չհերքեցին այդ տեսակետը, մի բան էլ ավելի՝ սպառնացին մեկուսացնել բոլոր նրանց, ովքեր կհամարձակվեն խանգարել Ցեղասպանության տարելիցին նվիրված միջոցառումները: Գրում է «Հրապարակ»-ը:

Ապրիլքսանչորսյան թոհուբոհն անցյալում է, ժամանակը չէ՞ ՀԽ անդամներին ազատ արձակելու: Երեկ ՀՀԿ-ական պատգամավորների կարծիքներն այս հարցում տարբերվում էին: Աշոտ Աղաբաբյանը վստահաբար պնդեց, որ ազատ արձակելու ժամանակն է, իսկ Գագիկ Մելիքյանը կուզենար, որ նրանց ընդհանրապես ազատ չարձակեին: «Ձեր հարցերի պատասխանը կտան իրավապահ մարմինները՝ գործի քննության ավարտից հետո»,- ասաց Մելիքյանը: Նա մնում է իր կարծիքին, որ նրանց չեն ձերբակալել մեկուսացնելու համար. «Նրանք գործողություններ էին փորձում կատարել՝ կոչերով, հայտարարություններով, պայքարի ինչ-ինչ ձեւերով»: Իշխանությունները չե՞ն փոշմանել ապրիլի 24-ի ՀԽ հանրահավաքը տեսնելով: Պարզվեց, որ ՀԽ-ն անհնազանդություններ չէր անելու. «Փոշմանելու հարց չկա, ես կասեի՝ անգամ հանրահավաք չեղավ, որովհետեւ ժողովուրդը նրանց հետեւից չգնաց, ժողովուրդը լավ գիտի ինչ անի այդ օրը»:

- Պարոն Աղաբաբյան, ժամանակը չէ՞, որ ազատ կարձակեն ՀԽ անդամներին:

- Իհարկե, այո: Թեպետ ապրիլի 24-ի հետ կապված ես կարծում եմ, որ իրենք իրոք սխալ քայլ են արել, իրենց ազատությունը պետք չէր օգտագործել նման պայմաններում, բայց հիմա անցել է, եւ ես կարծում եմ, որ, ինչ խոսք, իրենց պետք է ազատ արձակեն:

- Այսինքն՝ Դուք կիսում եք ՀԽ անդամների տեսակետը, որ նրանց ձերբակալել են զուտ ապրիլքսանչորսյան միջոցառումների համար, եւ այլ հիմնավորում չկա:

- Գիտեք ինչ, ճշմարտությունը չասել ոչ մեկն իրավունք չունի, բայց ճշմարտության չափ էլ գոյություն ունի, ամեն մարդու ասածն էլ ճշմարտություն չէ: Ճշմարտությունն ինքը հիմնավորում պիտի ունենա: Բոլոր դեպքերում խոսքի ազատություն գոյություն ունի, չի կարելի, ընդհանրապես մարդու իրավունքը, ինտելեկտը չպիտի կորի, եւ որ կորցնում են, դա չի նշանակում, որ իրանք ազատամարտիկ են եւ մարտնչող տղերք են, այդպես չի: Ես մի անգամ իրանց սխալ հանել եմ, ազատության համար մարտնչող տղերքը նախ իրենք պետք է ճիշտ ապրեին:

- Իսկ որտե՞ղ են սխալվել իրենք:

- Ես ասե՞լ եմ սխալ են արել:

Մանրամասները՝ թերթի այսօրվա համարում: