«Զակուսկին» ունեին, անցան սպիրտին

Այսօր մամուլում տեղեկություն էր հրապարակվել, որ կառավարությունում ամենաբարձր մակարդակով օրենքի նախագիծ են նախապատրաստում՝ սպիրտի ներմուծման ոլորտը մոնոպոլիզացնելու համար:

Նաև ենթադրվում է, որ հաշվի առնելով հայկական կլանաօլիգարխիկ բարքերը՝ այդ գործի գլուխ կլինեն հենց այդ ամենաբարձր կառավարական մակարդակի մարդիկ: Մեզ հաջողվեց պարզել, որ այդ տեղեկատվությունը և ենթադրություններն ամենևին էլ հեռու չեն իրականությունից:

Մեր տեղեկություններով՝ այս նորամուծության ամենաշահագրգիռ պետական պաշտոնյան անձամբ ՀՀ վարչապետ Հովիկ Աբրահամյանն է: Ավելին, վերջինս ոչ միայն ձգտում է իրենով անել սպիրտի ներմուծումը, այլև ձգտում է իր վերահսկողության տակ վերցնել նաև սպիրտի ողջ արտադրությունը հանրապետության ներսում: Այսինքն, եթե որոշ ճգնաժամային երկրներում սպիրտի ոլորտին տալիս են պետական մենաշնորհային կարգավիճակ, ապա Հայաստանում նման կարգավիճակ փորձում է ստանձնել պետության ամենաբարձրաստիճան պաշտոնյաներից մեկը:

Նույն աղբյուրի համաձայն, նշված օրինագծի մշակումն ամբողջ թափով արդեն իսկ ընթանում է: Օրինագծի վրա տքնաջան աշխատում են էկոնոմիկայի, գյուղնախարարության և ֆինանսների նախարարության մաքսային ոլորտի պատասխանատուները: Մասնավորապես՝ սպիրտի ներմուծման նրբերանգների մշակմամբ զբաղվում է անձամբ ֆինանսների փոխնախարար Արթուր Աֆրիկյանը:

Ջերմոցների և գյուղացիական տնտեսություններում բանջարաբոստանային կուլտուրաների մենաշնորհայնացումից հետո, անշուշտ, վարչապետը պետք է «վերցներ» նաև սպիրտի շուկան: Ի վերջո, «զակուսկի»-ն առկա է, պետք է ձեռք բերել նաև այս մենաշնորհը:

Հուսանք՝ վարչապետի հաջորդ քայլը վիտրեզվատելների՝ սթափարանների մենաշնորհացումը չի լինի:

Արամ Հակոբյան