Շարմազանովը թուրքական ծրագիրը տապալված է համարում

Հայոց ցեղասպանությունից 100 տարի անց հայ ժողովուրդն աշխարհին ներկայանում է ուժեղ, անկախ, ինքնիշխան հայոց պետականությամբ և Հայաստան-Սփյուռք-Արցախ միասնությամբ: Այս մասին Ազգային ժողովում հայտարարությունների ժամին հայտարարեց ԱԺ փոխնախագահ Էդուարդ Շարմազանովը: «Սա է այն գլխավոր խորհուրդը, որ մենք կարող ենք արձանագրել Հայոց ցեղասպանությունից 100 տարի անց: Ավելին, մենք ցույց տվեցինք, որ մենք ոչ միայն մեր արդար դատի պահանջատերն ենք, այլ նաև Հայաստանի Հանրապետությունը կարող է առաջնորդել մարդկության դեմ իրականացված ամենածանր հանցագործության՝ ցեղասպանության դեմ միջազգային պայքարը: Այդ առաքելությունը Հայաստանը և հայությունը վերցրել են»,-  նշեց Շարմազանովը:

Նրա խոսքով՝ դրա մասին են վկայում վերջին զարգացումները: «Թուրքիայում ոչ ադեկվատ ընդունվեցին թե՛ Հայաստանում կազմակերպված միջոցառումները, թե՜ մեր գործընկեր երկրներից հնչած գնահատականները: Թուրքիայի արտաքին գործերի նախարարությունը միանգամից քննադատեց Ռուսաստանի, Միացյալ Նահանգների, Գերմանիայի, Կիպրոսի, Հունաստանի, Ավստրիայի և մի շարք այլ երկրների առաջնորդների կամ ներկայացուցիչների: Սա խոսում էր մի կարևորագույն փաստի մասին. Թուրքերի ծրագիրը տապալվել է: Գալիպոլին տապալվեց, և այնպես տապալվեց, որ նրանք շփոթված ուղիղ եթերում ցուցադրեցին ոչ թե Գալիպոլիի, այլ Ծիծեռնակաբերդի միջոցառումը: Նրանք այնպես տապալվեցին, որ կոչ էին անում Օլանդին և Պուտինին օբյեկտիվություն դրսևորել Լեռնային Ղարաբաղի հարցում և մտահոգված էին, որ Մինսկի խմբի համանախագահող երկու երկրների ղեկավարները գտնվում էին Հայաստանում: Մեկը լինի հարց տա՝ դուք ի՞նչ գործ ունեք Մինսկի խմբի համանախագահության հետ»,- ընդգծեց Շարմազանովը:

Նա հայտարարեց, որ Լեռնային Ղարաբաղի Հանրապետությունը կայացած, ժողովրդավարական երկիր է: «Եվ շուտով միջազգային դիտորդները դրանում ևս մեկ անգամ կհամոզվեն: Մայիսի 3-ին տեղի են ունենալու Լեռնային Ղարաբաղի Հանրապետության Ազգային ժողովի ընտրություններ: Մենք՝ Հայաստանի Ազգային ժողովի պատգամավորներս պատիվ ենք ունենալու լինել այնտեղ և բոլոր միջազգային դիտորսների հետ ևս մեկ անգամ կփաստենք, որ Արցախն այլևս ազատ, անկախ և ժողովրդավարական հանրապետություն է, և սա այն դեպքն է, որ Բելը չի կարող հաղթել Հայկին, Հայկը միշտ հաղթելու է Բելին»,- եզրափակեց Շարմազանովը: