Ադրբեջանական ֆաշիզմ. պատգամավորն Անկարային կոչ է արել Թուրքիայից արտաքսել բոլոր հայերին

Հայոց ցեղասպանության 100-ամյա տարելիցի կապակցությամբ հայ ժողովրդին աշխարհի առաջադեմ մարդկության կողմից արվող ցավակցական ուղերձների և Ցեղասպանությունը դատապարտող հայտարարությունների ֆոնին Ադրբեջանում շարունակվում է պետական մակարդակ բարձրացված հայատյաց ֆաշիստական քաղաքականությունը:

Հայոց ցեղասպանությունը ճանաչած երկրների մեծ թվից ցնցված Ադրբեջանում, որտեղ վերջին հային սպանել կամ քշել են դեռևս 1990 թվականին, Թուրքիային կոչ են անում վարվել նույն կերպ, և երկրից արտաքսել բոլոր հայերին:

Ինչպես հաղորդում է «Արմենպրես»-ը, այս մասին ադրբեջանական moderator.az և «Հուրրիեեթ» թերթին տված հարցազրույցում հայտարարել է Ադրբեջանի խորհրդարանի պատգամավոր Էլման Մամմադովը:

Նա հոխորտացել է, թե «Թուրքիան և Ադրբեջանը միասին մեկ հարվածով կարող են աշխարհի երեսից ջնջել Հայաստանը, և հայերը պետք է վախենան այդ մտքից»:

«Ինչու՞ են Թուրքիայում հայերի հարստանալու համար բարենպաստ պայմաններ ստեղծում: Թուրքիա, քո տարածքից վեջապես վռնդիր բոլոր հայերին, և թող նրանք դրանից հետևություններ անեն»,- Անկարային կոչ է արել ադրբեջւանցի պատգամավորը' պահանջելով հայերի դեմ «շտապ և խիստ միջոցներ» ձեռնարկել:

Ինչպես բնորոշել են ադրբեջանական ԶԼՄ-ները՝ հայատյացությունն Ադրբեջանում վերածվել է պետական զբաղմունքի:

Ապրիլի 24-ին Հայոց ցեղասպանության մասին ռեպորտաժներ հեռարձակելու համար Ադրբեջանում արգելափակել են ռուսաստանյան ՏՆՏ և ՆՏՎ հեռուստաալիքները, իսկ հայտնի ադրբեջանցիներին հայրենակիցները դատապարտել են Հայոց ցեղասպանության հետ կապված ցավակցություն հայտնելու կոչեր հնչեցնելու համար: