Ջազի միջազգային օրը մայրաքաղաքում մեծ շուքով կնշվի

Ջազի միջազգային օրը' ապրիլի 30-ը, այս տարի ևս կհամախմբի հայ և միջազգային լավագույն ջազմեններին ու ջազ-բենդերը: Երևանի քաղաքապետ Տարոն Մարգարյանի հովանու ներքո, արդեն մի քանի տարի անընդմեջ, մայրաքաղաքում տոնը մեծ շուքով է նշվում:

Ապրիլի 30-ին, ժամը 20:00-ին Կասկադ համալիրի հարակից տարածքում տեղի կունենա համերգ՝ նվիրված Ջազի միջազգային օրվան, որի շրջանակում հանդես կգան ազգությամբ հայ ջազ երաժիշտներ Մակեդոնիայից՝ Թավիջյան եղբայրներն իրենց տրիոյով:

Համերգի մասնակիցներն են Գարո և Դիրան Թավիջյանները, Գորան Գեշովսկին, ՀՀ արվեստի վաստակավոր գործիչներ Արմեն Թութունջյանը, Վահագն Հայրապետյանը, Երվանդ Երզնկյանը, Մարտին Վարդազարյանը, Հայաստանի պետական ջազ-նվագախումբը՝ ՀՀ արվեստի վաստակավոր գործիչ Արմեն Հյուսնունցի ղեկավարությամբ, տաղանդավոր երաժիշտ Կարեն Մամիկոնյանը և այլք:

Գալա-համերգին կհաջորդի Թավիջյան եղբայրների համերգը «Մեցցո» ակումբում՝ նույն օրը և տեղի կունենա ջեմ-սեյշն Արմեն Հյուսնունցի, Խաչիկ Սահակյանի, Տիգրան Սանոյանի և Վարդան Առաքելյանի մասնակցությամբ:

Թավիջյան եղբայրները Մակեդոնիայում և առհասարակ Եվրոպայում լայն ճանաչում ստացած ջազմեն եղբայրներ են: Նրանք ավելի քան չորս հարյուր համերգներ են ունեցել Եվրոպայում եւ Ամերիկայում: Թավիջյան եղբայրները Մակեդոնիայում արժանացել են «Մակեդոնիայի երաժշտության դեսպաններ» բարձր կոչմանը, ինչպես նաև դարձել են բրիտանական «SONY JAZZ» մրցույթի դափնեկիրներ:

Նրանք հայտնի են նաև որպես բարձրակարգ կոմպոզիտորներ և պրոդյուսերներ, ովքեր համագործակցել և ելույթ են ունեցել մի բեմում այնպիսի աշխարհահռչակ երաժիշտների հետ, ինչպիսիք են Ջո Զավինուլը, Չիկ Կորեան, Ռհանի Կրիջան, Ռոզանա Վիտրոն, Ռիշար Գալյանոն, այլք:

Թավիջյան ընտանիքը Մակեդոնիայում ամենահայտնի հայկական գերդաստաններից է: Նրանք Ցեղասպանության հետևանքով Արևմտյան Հայաստանից տեղահանված և Մակեդոնիայում նոր կյանք սկսած գերդաստանի 4-րդ սերնդի ներկայացուցիչներն են:

Գարոն և Դիրանը ծնվել են երաժշտական ընտանիքում: Նրանց հայրը՝ Կարապետ Թավիջյանը, նույպես երաժիշտ է: Տարբեր երաժշտական գործիքներով շրջապատված լինելը օգնել է մասնագիտության ընտրության հարցում, նաև ստիպել սիրել երաժշտությունը:

Վերջին 15 տարիների շարունակական աշխատանքի արդյունքում Թավիջյան եղբայրները վաստակել են իրենց տեղը որպես Մակեդոնիայի լավագույն և առաջատար երաժիշտներ: