««Արևելյան գործունեություն» ծրագիրն ուղղված է մեր կուտակած փորձի և ձեռքբերումների փոխանակմանը». Եժի Նովակովսկի

«Արևելյան գործընկերություն» ծրագիրը քաղաքական կամ տարածքային առումներով ընդլայնվելու նպատակ չի հետապնդում, քանի որ այն ուղղված է առաջին հերթին մեր կուտակած փորձի և ձեռքբերումների փոխանակմանը: «Արևելյան գործընկերություն» ծրագրի քննադատները հաճախ են շեշտում, որ այդ ծրագրի միջոցով մենք փորձում ենք խանգարել Ռուսաստանի հետ որոշ երկրների համագործակցությանը, ինչը թյուր կարծիք է: Բացի այդ՝ «Արևելյան գործընկերություն» ծրագրի մասին հաճախ են խոսում անցյալ ժամանակով, մինչդեռ Հայաստանը և Եվրամիությունը Ռիգայի գագաթնաժողովին կրկին քննարկելու են երկկողմ համագործության տարբերակները»,-«Արմենպրես»-ի հաղորդմամբ՝ մայիսի 4-ին լրագրողների հետ կայացած հանդիպմանը հայտնեց ՀՀ-ում Լեհաստանի Հանրապետության արտակարգ և լիազոր դեսպան Եժի Նովակովսկին՝ հույս հայտնելով, որ Հայաստանի և Եվրամիության միջև առաջիկայում կհաստատվեն սերտ հարաբերություններ, և Հայաստանն ավելի կմոտենա Եվրամիությանը:

Նա նշեց, որ Հայաստանը և Եվրամիության, և Լեհաստանի համար հեռանկարային գործընկեր է: «Հաշվի առնելով ինչպես պատմական, այնպես էլ մշակութային կապերը՝ Հայաստանը Եվրամիության համար հարմար գործընկեր է, և ես հուսով եմ, որ Հայաստանն ամենաբարձր մակարդակով ներկայացված կլինի առաջիկայում կայանալիք Արևելյան գործընկերության Ռիգայի գագաթնաժողովին»,-նկատեց Եժի Նովակովսկին:

Անդրադառնալով մայիսի 3-ին Լեռնային Ղարաբաղում կայացած խորհրդարանական ընտրություններին՝ Եժի Նովակովսկին ասաց հետևյալը. «Լեռնային Ղարաբաղի ճանաչման հարցը դեռևս առկախ է, և Եվրամիության ոչ մի երկիր չի ճանաչել այն, ուստի քաղաքական գնահատական տալը սխալ է: Սակայն ես կիսում եմ ԵԱՀԿ Մինսկի խմբի համանախագահների այն կարծիքը, որ Արցախի ժողովուրդը իրավունք ունի ինքը որոշել իր ապագան»,-շեշտեց նա և հավելեց, որ Լեհաստանի կառավարության տեսանկյունից՝ Լեռնային Ղարաբաղը իրավական կարգավիճակ չունեցող տարածք է և պետություն համարվել չի կարող: