Ռադիոյի ստեղծումը շատ բան փոխեց մարդկանց կյանքում. Մայիսի 7-ին նշվում է ռադիոյի միջազգային օրը

Ռադիոն շատ բան փոխեց մարդկանց կյանքում և դարձավ այսօրվա լրատվամիջոցների նախահայրը: Հայաստանի հանրային ռադիոյի գործադիր տնօրեն Արմեն Ամիրյանը համոզված է՝ ռադիոն շատ ավելի հասանելի է հանրությանը, քան որևէ այլ լրատվամիջոց:

«Ռադիոն Հայաստանում 89 տարեկան է: Հայաստանի հանրային ռադիոն մշակութային, գիտակրթական հաստատություն է և լրատվամիջոց: Հանրային ռադիոն կարողացել է փոխանցել սերունդներին այն ժառանգությունը, որ ունեցել է, այսօր էլ շարունակում ենք այդ գործընթացը: Մենք այսօր փորձում ենք որդեգրել բոլոր ժամանակակից միջոցները: Մենք գիտակցում ենք, որ համացանցային զարգացումները մեզ տանում են այլ ուղղությամբ, և թե՛ կայքէջերը, թե՛ ռադիոները փորձում են վիզուալացնել իրենց նյութերը տեսանյութերի և լուսանկարների միջոցով»,- «Արմենպրես»-ի փոխանցմամբ՝ Ռադիոյի միջազգային օրվան ընդառաջ հրավիրված ասուլիսի ընթացքում նշեց Արմեն Ամիրյանը:

Նրա խոսքով՝ Հանրային ռադիոն այսօր 14 լեզուվով հաղորդումներ է հեռարձակում:

«Ռադիոն այսօր շատ ավելի հասանելի է հանրությանը, մեքենայի մեջ ավելի շատ կարելի է ռադիո լսել: Շատ մոտ ապագայում բոլոր լրատվամիջոցները համահավասարեցման դաշտում են հայտնվելու, կարևորը բովանդակությունն է լինելու, գնահատվելու է օպերատիվությունը և հասարակությանը շուտ ներկայացնելը»,- համոզված է Ամիրյանը:

Նրա խոսքով՝ ռադիոն շատ ավելի հոգեհարազատ է իրեն, որովհետև ռադիոյում առկա է իրական ժուռնալիստիկա: «Հեռուստատեսությունում լրագրողի խոսքի բացը կադրով է լրացվում, իսկ ռադիոյում այդպես չէ: Ռադիոն լուրջ գիտակրթական հաստատություն է»,- հավելեց Արմեն Ամիրյանը:

Մայիսի 7-ը Ռադիոյի միջազգային օրն է: Հենց այս օրը 1895 թվականին ռուս ֆիզիկոս Ալեքսանդր Պոպովը հանրությանը ներկայացրեց իր զեկույցն ու իր ստեղծած աշխարհում առաջին ռոդիոսարքավորումը՝ իրականացնելով առաջին ռադիոկապը: 1926-ի սեպտեմբերի 1-ին առաջին անգամ եթերում հնչեց Երևանի ձայնը: