Մահացել է Տ. Սահակ ավագ քահանա Սահակյանը

Մայիսի 3-ին երկարատև ծանր հիվանդությունից հետո ի Տեր ննջեց ԱՀԹ Քանաքեռի ս. Հակոբ եկեղեցու հոգևոր հովիվ արժանապատիվ Տ. Սահակ ավագ քահանա Սահակյանը: Նա 2001թ. ծառայում էր Արարատյան Հայրապետական թեմում:

Տեր հոր հարուստ կենսագրության մեջ իր նշանակալի տեղն է ունեցել Կիրովաբադում ծառայած շրջանը: Արցախյան պատերազմի սկզբում, երբ Ադրբեջանի հայկական համայնքները ենթարկվում էին ջարդերի ու սպանդի, Տեր հայրը եկեղեցում հավաքեց ու պատսպարեց քաղաքի բազմահազար հայությանը:

Նրա համարձակության շնորհիվ էր, որ Կիրովաբադի հայերը եկեղեցու բակում կարողացան կազմակերպել ինքնապաշտպանությունն ու հեռանալ քաղաքից առանց կորուստների: Տեր հոր շնորհիվ Կիրովաբադում հնարավոր եղավ խուսափել զանգվածային սպանություններից:

Յիշատակ արդարոց օրհնութեամբ եղիցի:

Տ. Սահակ ավագ քահանա Սահակյանի կենսագրությունը

Տեր Սահակ (ավազանի անունը՝ Մկրտիչ) ավագ քահանա Սահակյանը ծնվել է 1950թ. ապրիլի 25-ին, Վրաստանի Ախալցխայի Փոքր Պամաջ գյուղում: Նրա պապերը գաղթել են պատմական Էրզրումից և եղել են քահանաներ: Նախ սովորել է գյուղի ութամյա, այնուհետև՝ Վալեի հայկական թիվ 3 միջնակարգ դպրոցներում:

1968-1970թթ. սովորել է Մայր Աթոռ Սուրբ Էջմիածնի Գևորգյան Հոգևոր ճեմարանում:

1970-1972թթ. ծառայել է խորհրդային բանակում:

1972թ. ընդունվել է Երևանի պետական համալսարանի ֆիզիկամաթեմատիկական ֆակուլտետը, այնուհետև տեղափոխվել Երևանի Կ. Մարքսի անվան Պոլիտեխնիկական ինստիտուտի մեխանիկական ֆակուլտետը և ավարտել 1979թ.:

1979-1981թթ. սովորել է Մայր Աթոռ Սուրբ Էջմիածնի Գևորգյան Հոգևոր ճեմարանում:

1981թ. ձեռամբ Տեր Հուսիկ արքեպիսկոպոս Սանթուրյանի ձեռնադրվել է ամուսնացյալ քահանա: 1981-1989թթ. ծառայել Ադրբեջանի Կիրովաբադ (Գանձա) քաղաքի հայկական Ս. Գրիգոր Լուսավորիչ եկեղեցում՝ որպես հոգևոր հովիվ: Ամենայն Հայոց կաթողիկոսի օրհնությամբ ստացել է լանջախաչ, այնուհետև՝ ծաղկյա փիլոն: 2008թ. հունավարից ստացել է ավագության աստիճան:

1989-1991թթ. ծառայել է Հյուսիսային Օսեթիայի Վլադիկավկազ (նախկին Օրջոնիկիձե) քաղաքի Ս. Գրիգոր Լուսավորիչ եկեղեցում:

1992-2000թթ. նշանակվել է Հնդկաստանի Կալկաթա քաղաքի հոգևոր թեմի առաջնորդ և ճեմարանի տեսուչ:

2000-2001թթ. ծառայել է Ուրուգվայի մայրաքաղաք Մոնտեվիդեոյի Ս. Ներսես Շնորհալի եկեղեցում՝ որպես հոգևոր հովիվ:

2001թ. մարտի 17-ից ծառայել է ԱՀԹ Ն. Չարբախի ս. Խաչ եկեղեցում՝ որպես հոգևոր հովիվ:

2002 թվականից ծառայում էր ԱՀԹ Քանաքեռի ս. Հակոբ եկեղեցում՝ որպես հոգևոր հովիվ: