2008 թվականին սկսվեց թրաֆիքինգի դեմ պայքարի հարցերում արմատական բեկման փուլը. Գագիկ Եգանյան

Նախօրեին Հայկական երկրորդ հեռուստաալիքով հեռարձակվող «Խոսքի իրավունք» հաղորդման հյուրն էր ՀՀ տարածքային կառավարման նախարարության միգրացիոն պետական ծառայության պետ Գագիկ Եգանյանը, որը խոսեց թրաֆիքինգի դեմ պայքարի ուղղությամբ կատարված աշխատանքների մասին: «Արդեն տաս տարի է՝ ինչ Հայաստանը ներառված է այս երևույթի դեմ պայքարի հարցերում և պայմանականորեն կարելի է աշխատանքները երեք փուլի բաժանել։

2002-2004 թթ. նշանավորվեցին նրանով, որ առաջին անգամ քրեական օրենսգրքի մեջ սահմանվեց թրաֆիքինգ երևույթը՝ ի՞նչ է իրենից ներկայացնում և համապատասխան պատժամիջոցները, բացի դրանից՝ ձևավորվեց միջգերատեսչական աշխատանքային խումբ և որպես արձագանք իրականացված քայլերի՝ ԱՄՆ-ի պետքարտուղարության ամենամյա զեկույցի մեջ Հայաստանի ջանքերը գնահատվեցին որպես երկրորդ խմբի երկրների շարքին արժանի ջանքեր։ Առաջինը դա նրանք են, որտեղ կա և՛ օրենսդրություն, և՛ բավական արդյունավետ պայքար այս երևույթի դեմ: Երկրորդ խումբը վերաբերում է այն երկրներին, որոնք ունեն օրենսդրություն, բայց դեռ պայքարի միջոցները նշանակալից հաջողություններ դեռևս չեն արձանագրել կամ ամբողջությամբ խնդիրը չեն լուծել: Եվ երրորդ խումբը, որտեղ ոչ օրենսդրությունն է պատշաճ մակարդակի վրա, ոչ էլ ջանքեր են կիրառում այս ուղղությամբ:

Եվ միայն 2008 թվականից հետո սկսվեց այս երևույթի դեմ պայքարի հարցերում արմատական բեկման փուլը: Եթե փորձենք երկու բառով այդ փուլի բնորոշ գիծը ասենք, այն է, որ համակարգված և հետևողական աշխատանք տարվեց այս երևույթի հետ կապված բոլոր դրսևորումների և հարցերի առնչությամբ: Նախ առաջինը բարձրացվեց այս հարցերով համակարգման լիազորություններ ունեցող խորհրդի կարգավիճակը: Մինչև այդ կար նախարարությունների վարչության պետերի մակարդակով գործող հանձնախումբ, ներկայումս՝ դրա փոխարեն գործում է փոխվարչապետի ղեկավարությամբ թրաֆիքինգի հարցերի խորհուրդ, որտեղ ընդգրկված են հանրապետության բոլոր պետական մարմինների ներկայացուցիչները: Խորհրդին կից ձևավորվեց միջգերատեսչական աշխատանքային խումբ, որը եղավ այն աշխատանքային մարմինը, որտեղ քննարկվում էր և համապատասխան առաջարկներ էր ներկայացվում խորհուրդին: Խորհուրդն իր աշխատանքները կազմակերպեց խիստ ծրագրված հիմքի վրա, այսինքն՝ կա գործողությունների ազգային ծրագիր, ներկայումս կա 2010-2012թթ. համար և պարբերաբար հրավիրվող խորհրդի նիստերով քննության է առնվում գործողությունների այս կամ այն ծրագրերի իրականացման հարցը», - նշեց Եգանյանը: