Գեղարքունիքի մարզում կատարվել է 6300 հեկտար գարնանացան

Գեղարքունիքի մարզի տնտեսություններում գարնանացան հացաբույսերի և կարտոֆիլի ցանքն ընթանում է տեղումնառատ, ոչ նպաստավոր եղանակային պայմաններում, որոշակի ընդհատումներով: Առաջին իսկ հնարավորության դեպքում, երբ դիտվում է արևոտ եղանակ, տնտեսություններում անմիջապես սերմացուն պահ են տալիս հողին:

Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի գյուղատնտեսության և բնապահպանության վարչության պետ Վանիկ Հովհաննիսյանը, մայիսի 6-ի դրությամբ մարզի համայնքներում արդեն կատարվել է մոտ 6300 հեկտար գարնանացան գարու և 120 հեկտար գարնանացան ցորենի, 50 հեկտար կարտոֆիլի ցանք:

«Գարնանացանը մեզ մոտ կատարված կարելի է համարել մոտ 30 տոկոսով: Տնտեսությունները հիմնականում ապահովված են սերմացուներով, դիզվառելիքով, պարարտանյութերով, վարող ու ցանող մեխանիզմների մատչելի ծառայությունների մատուցմամբ: Խանգարող միակ գործոնն առայժմ անբարենպաստ եղանակն է, այլապես այս պահի դրությամբ գարնանացանը կարող էինք կատարած լինել մոտ 70 տոկոսի չափով: Առաջին իսկ հնարավորության դեպքում երկրագործները կատարում են ցանքը: Կարծում եմ, առաջիկա մեկ-երկու շաբաթում արդյունքներն ավելի ակնառու կլինեն»,-նշեց Վանիկ Հովհաննիսյանը:

Գարնանացան հացաբույսերի ցանքերը Գեղարքունիքում, ըստ նույն աղբյուրի կանխատեսումների, կկազմեն մոտ 21 հազար հեկտար:

Խոսրով Խլղաթյան