Գալուստ Սահակյանը պարգևատրել է Արցախյան պատերազմին մասնակցած ԱԺ-ի մի խումբ աշխատակիցների

ԱԺ նախագահ Գալուստ Սահակյանը մայիսի 7-ին Հաղթանակի և խաղաղության տոնի առթիվ պարգևատրել է Ազգային ժողովի՝ Արցախյան պատերազմին մասնակցած մի խումբ աշխատակիցների: ՀՀ ԱԺ նախագահի խորհրդական Ալբերտ Հերոյանը, ԱԺ ֆինանսավարկային և բյուջետային հարցերի մշտական հանձնաժողովի փորձագետ Արտյուշա Ահարոնյանը, ԱԺ աշխատակազմի հեռահաղորդակցության համակարգերի սպասարկման բաժնի առաջատար մասնագետ Արարատ Կարապետյանը, ԱԺ աշխատակազմի գործերի կառավարչության բարեկարգման և սպասարկման բաժնի վարիչի տեղակալ Հակոբ Հակոբյանը, ԱԺ աշխատակազմի գործերի կառավարչության բարեկարգման և սպասարկման բաժնի տնտեսվար Սահակ Օրդոյանը, Աժ աշխատակազմի գործերի կառավարչության բարեկարգման և սպասարկման բաժնի այգեգործ Համլետ Հերոյանը և ԱԺ աշխատակազմի գործերի կառավարչության շենքերի շա հագործման բաժնի էլեկտրիկ Վլադիմիր Բաղդասարյանը պարգևատրվել են ՀՀ Ազգային ժողովի պատվոգրերով:

Ազգային ժողովի նախագահը, բարձր գնահատելով ԱԺ աշխատակիցների՝ Արցախյան պատերազմի տարիներին հայրենիքին մատուցած ծառայությունը, շնորհավորել է նրանց Հայրենական մեծ պատերազմում հաղթանակի 70-ամյակի և Շուշիի ազատագրման առթիվ: Նա նշել է, որ հայ ժողովրդի փառքի ճանապարհը դարեր է ձգվում. Ցեղասպանությունից փրկված ազգի զավակները, մասնակցելով Մեծ հայրենականին, կանխել են նոր սպանդներ և շարունակել իրենց հաղթական երթը մինչև Շուշի: