Գյումրիում հայկական և ռուսական զորքերը համատեղ շքերթ նվիրեցին Հաղթանակի 70-ամյակին

Մայիսյան հաղթանակների առթիվ այսօր բազմամարդ էր Գյումրու «Մայր Հայաստան» հուշահամալիրի տարածքը: Մարզային և քաղաքային իշխանությունների ներկայացուցիչները նախ հարգելով Հայենական մեծ պատերազմում զոհված հերոսների հիշատակը՝ ծաղկեպսակ դրեցին «Անմար կրակի» մոտ: Անցած տարիների նման այս տարի ևս միջոցառմանը ներկա էին պատերազմի վետերանները:

Տոնական միջոցառմանը շնորհավորելով բոլորին` Շիրակի մարզպետ Ֆելիքս Ցոլակյանը նշեց, որ 70 տարի առաջ ձեռք բերած հաղթանակը փառահեղ էր, ինչի համար պետք է շնորհակալ լինենք թե՛ նրանց ում արյան գնով վաստակեցինք հաղթանակը և թե՛ նրանց, ում շարքերն այսօր նոսրանում են: «Եթե մենք մեր հարգանքի տուրքը և վերաբերմունքը չունենանք այս մարդկանց հանդեպ, մենք մեծ սխալ կգործենք մեր հատագա սերնդի առաջ»,-նշեց Ֆելիքս Ցոլակյանը: Ներկաներին ողջունեց և շնորհավորեց նաև Գյումրու քաղաքապետ Սամվել Բալասանյանը: «Դուք կռել եք այս հաղ թանակը այսօրվա համար: Մոտ ինը հազար գյումրեցի մասնակցեց Մեծ Հայրենականին, բայց տուն վերադարձավ երեք հազարը: Պետք է գլուխ խոնարհենք զոհվածների հիշատակի առջև: Մենք հպարտ ենք , որ ապրում ենք Մեծ Հայրենականի և Արցախյան հերոսամարտի վետերանների և մասնակիցների կողքին»,- նշեց Գյումրու քաղաքապետը:

Շնորհավորական ելույթներից հետո տեղի ունեցավ Հայաստանի զինված ուժերի՝ ՀՀ ՊՆ Շիրակի կայազորի և Գյումրիում տեղակայված 102-րդ ռազմաբազայի՝ հակատանկային գնդի զինվորների համատեղ շքերթը: Շքերթին մասնակցում էին նաև ռուսական և հայկական զորքերի փողային նվագախմբերը:

Երեկոյան հուշահամալիրի տարածքում տեղի կունենա տոնական հրավառություն: Միջոցառումներ անցկացվում եմ մարզի գրեթե բոլոր համայնքներում: Ինչպես «Արմենպրես»-ին փոխանցեց Շիրակի մարզպետի խորհրդական Հասմիկ Կիրակոսյանը, այդ միջոցառումները չեն սահմանափակվի միայն մայիսի 9-ով: Մարզի քաղաքային համայնքներից բացի, տոներին նվիրված բազմաբովանդակ ծրագրեր են նախատեսել նաև գյուղական համայնքները: «Հայաստանում չկա այդպիսի գյուղ, այդ թվում նաև Շիրակի մարզի գյուղերից, որ չունենա Մեծ Հայրենականի ու Արցախյան հերոսամարտի մասնակից: Դա է պատճառը, որ Եռատոնը մեծ հոգով է նշվում ամենուր: Սա մեծ հաղթանակ է: Անշուշտ, այս տարի Եռատոնի կիզակետում Հայրենականն է, բայց հայի համար Շուշին շատ ավելի կարևոր է՝ իր երկրի, իր հողերի ազատագրման համար: Կարևոր է այն երկրի համար կռվելը, որը հայրենիք է կոչվում և մեր պապերն իրենց կենսագրության վառ էջերը և կյանքը տվեցին, որ մենք այսօր ունենանք անկախ Արցախ, անկախ Հայաստան և այնպիսի կամքի ուժ, որ պատերազմներին դեմ առ դեմ կանգնենք ու ասենք ո՛չ»,-նշեց Հասմիկ Կիրակոսյանը:

Արմենուհի Մխոյան