Մոսկվայում մեկնարկում է Չեխովի անվան միջազգային թատերական փառատոնը

Մոսկվայում 12-րդ անգամ մեկնարկում է Չեխովի անվան թատերական միջազգային փառատոնը: Ռուսաստանում համաշխարհային բեմական արվեստի բարձրագույն նվաճումների ամենաներկայացուցչական համաժողովը տեղի կունենա մայիսի 13-ից մինչև հուլիսի 17-ը, ինչն ընդհանուր առմամբ կկազմի ավելի քան երկու ամիս, տեղեկացնում է «Արմենպրես»-ը:

«Ոչ մի կարգի պատժամիջոցներ և ֆինանսական սահմանափակումներ չեն ազդել մեր փառատոնի ծրագրի վրա»,- ՏԱՍՍ-ին հայտարարել է Չեխով-ֆեստի գլխավոր տնօրեն Վալերի Շադրինը: Նրա խոսքով՝ «չնայած ներկայում ստեղծված բարդ քաղաքական իրադրությանը, օտարերկրացի մասնակիցների կողմից ոչ մի մերժում չի եղել, այնպես որ նախապես հայտարարված ծրագիրը փոփոխություններ չի կրել և կիրականացվի ամբողջությամբ՝ տակավին երկու տարի առաջ կազմված ծրագրին համապատասխան»: «Առաջիկա ստուգատեսին կմասնակցեն 19 ներկայացումներ 12 երկրներից, որոնց տոմսերն ակտիվորեն գնվ ում են»,- հավաստիացրել է Շադրինը:

Նա հիշեցրել է, որ Չեխովյան փառատոնը հիմնվել է 1992 թվականին: Այդ ժամանակի ընթացքում ռուս հանդիսատեսը դիտել է ավելի քան 500 ներկայացում աշխարհի 40 երկրներից, և այդ աշխարհագրությունը մշտապես ընդլայնվում է: Այսպես, ներկայիս ստուգատեսին առաջին անգամ մասնակցում է ներկայացում Հարավային Աֆրիկայի Հանրապետությունից՝ «Ինալա» անվանումով: Փառատոնի մասնակիցների ցուցակում են նաև Իտալիայի Stabile di Napoli թատրոնը, «1927» ընկերությունը (Մեծ Բրիտանիա), երկու խմբեր Գերմանիայից՝ Շտուտգարտի և Նյուրնբերգի պետական թատրոնները: