ՀՀ ԶՈՒ-ն անընդհատ կատարելագործում է ռազմական տեխնիկան

Հայկական զինված ուժերն անընդհատ կատարելագործում են ռազմական տեխնիկան, և այս ընթացքում ձեռք են բերվել տարատեսակ ինժեներական սարքեր, զինտեխնիկա, անօդաչու սարքեր: Հայտարարությունը ՀՀ պաշտպանության նախարար Սեյրան Օհանյանինն է: «Արմենպրես»-ի փոխանցմամբ՝ Նոյեմբերյանի զորամասերից մեկում կայացած ասուլիսի ժամանակ Օհանյանը նշեց, որ բարելավվել է ՀՀ ռազմաարդյունաբերական ներուժը, գործընկեր պետությունների հետ համատեղ հիմնադրված ձեռնարկությունների հետ գիտահետազոտական, թողարկումների և փորձարկումների, գնումների ստանդարտացման համակարգ է ներդրվում:

«Այս ժամանակահատվածն առանձնահատուկ էր: Ձևավորվել է 2016-2020թթ. ԶՈւ պաշտպանության ոլորտի զարգացման պլանը, որտեղ կներառվեն պաշտպանական ոլորտի բոլոր գերատեսչությունների համապատասխան խնդիրները՝ պաշտպանական միասնական համակարգ ձևավորելու համար»,- ասաց Օհանյանը' հավելելով, որ 2014թ.-ն ձեռքբերումների և դիրքերի կայունացման տարի էր: «Բանակի ձեռքբերումները պատահականություն չեն: Դրանք համատեղ, հետևողական և սկզբունքային աշխատանքի արդյունք են: Մենք սահմանին կանգնած զինվորին ու սահմանամերձ բնակավայրերի գյուղացուն, քաղաքացուն նույն հարթության վրա ենք դնում, որովհետև մեկ միասնական ձևով ենք ապահովելու մեր երկրի անվտանգությունը»,- շեշտեց ՀՀ պաշտպանության նախարարը:

Ձեռքբերումներին զուգահեռ՝ նա մատնանշում է նաև թերությունները: «Հակառակորդի սադրիչ գործողությունների պատճառով անդառնալի կորուստներ ենք ունեցել: Բանակում որոշ կառույցներում ոչ կանոնադրական հարաբերությունների մնացորդնների հետևանքով միջադեպեր են գրանցվում, սոցիալական պաշտպանության ոլորտում նույնպես կան բացթողումներ: ԶՈւ և սպառազինության համակարգի զարգացման հարցում նույնպես կան հարցեր, բայց դրանք չեն խանգարել, որ ԶՈւն-ն կատարի իր առջև դրված գերխնդիրը. այն է՝ տարածքային ամբողջականություն, սահմանների անձեռնմխելիություն, մարդկանց անվտանգություն»,- ընդգծեց Սեյրան Օհանյանը: