ՆԱՏՕ-ի գլխավոր քարտուղարը կարևորել է Մինսկի համաձայնությունների շտապ իրագործումը

Մինսկի համաձայնությունները պետք է ամբողջությամբ կատարվեն: Այդ մասին, ինչպես տեղեկացնում է «Արմենպրես»-ը, հայտարարել է ՆԱՏՕ-ի գլխավոր քարտուղար Ենս Ստոլտենբերգը Թուրքիայի Անթալիայի նահանգի Բելեկ քաղաքում Հյուսիսատլանտյան դաշինքի ԱԳ նախարարների գագաթանաժողովի սկսվելուց առաջ:

«Մինսկի համաձայնությունները պետք է ամբողջությամբ կատարվեն, պետք է հարգվի հրադադարի ռեժիմը, դուրս բերվեն ծանր սպառազինությունները»,- ասել է նա: Ստոլտենբերգը հավելել է, որ «այժմ եկել է գործելու ժամանակը, և Մինսկի պայմանավորվածությունները կատարելու շտապ անհրաժեշտություն կա»:

Դաշինքի գլխավոր քարտուղարը նաև հայտնել է, որ ՆԱՏՕ-ն մտադիր է Աֆղանստանում մնալ երկար ժամանակ: «Մենք մտադիր ենք Աֆղանստանում ներկայությունը երկար ժամանակ պահպանել նաև դաշինքի «Վճռական աջակցություն» առաքելության ավարտից հետո»,- ընդգծել է նա:

Հրահանգիչների և խորհրդականների «Վճռական աջակցություն» առաքելությունը գործարկվել է այս տարվա հունվարի 1-ից՝ Աֆղանստանից դաշինքի հիմնական մարտական ուժերի դուրսբերումից հետո: Դրան մասնակցում են ՆԱՏՕ-ի և գործընկեր երկրների 12,5 հազար զինվորականներ, որոնց հիմնական մասը ԱՄՆ-ի ներկայացուցիչներն են:

Մայիսի 13-ին Թուրքիայում մեկնարկում է Հյուսիսատլանտյան դաշինքի ԱԳ նախարարների գագաթանաժողովը, որի մասնակիցները քննարկելու հավաքական անվտանգության ապահովման հարցերը և Ուկրաինայի իրադրությունը: ՆԱՏՕ-ի անդամ 28 երկրների արտաքին գործերի նախարարներից բացի, հանդիպմանը մասնակցում են Հայաստանի, Ադրբեջանի, Բոսնիայի և Հերցեգովինայի, Վրաստանի, Ուկրաինայի, Մոնղոլիայի, Հարավային Կորեայի, Ճապոնիայի, Հորդանանի ներկայացուցիչները, երկրներ, որոնք աջակցություն են ցուցաբերում Աֆղանստանում դաշինքի առաքելությանը:

Երկօրյա հանդիպման ընթացքում կկայանա ՆԱՏՕ-Ուկրաինա հանձնաժողովի նիստը, որը կբացի դաշինքի գլխավոր քրատուղար Ենս Ստոլտենբերգը: Ինչպես ճշտել է Թուրքիայի արտաքին քաղաքական գերատեսչությունը, Ուկրաինայի իրադրության քննարկման արդյունքում նախարարները պլանավորում են ընդունել համատեղ հայտարարություն:

Ինչպես նշում է ՏԱՍՍ-ը, հիմնական օրակարգից բացի, նախարարները և պատվիրակությունների անդամները ժամանակ կունենան վերլուծելու Սիրիայում եւ Իրաքում ահաբեկիչների դեմ պայքարի ընթացքը: