Հայաստանը Գրքի միջազգային ցուցահանդեսին ներկայացրել է Ցեղասպանության թեմայով հրատարակություններ

Հայաստանը մայիսի 7-10-ը մասնակցել է Սալոնիկի Գրքի 12-րդ միջազգային ցուցահանդեսին: Հայաստանի մասնակցությունը նվիրված է եղել Հայոց ցեղասպանության 100-րդ տարելիցին և կազմակերպվել է ՀՀ մշակույթի նախարարության և Հայոց ցեղասպանության 100-րդ տարելիցի Հունաստանի հանձնաժողովի կողմից: Ինչպես տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, ի հավելումն Հայաստանից բերված հրատարակությունների, ցուցադրության համար արժեքավոր գրքեր են տրամադրվել նաև Հունաստանի Հայ Ավետարանական եկեղեցու «Արևիկ» գրատան և հունահայ «Արմենիկա» ամսագրի խմբագրության կողմից:

Հայկական տաղավարում ցուցադրվել են վերջին տարիներին Հայաստանում և արտերկրում տպագրված հայերեն, հունարեն և օտարալեզու հրատարակություններ' մեծամասամբ Հայոց ցեղասպանության թեմայով:

Մայիսի 7-ին ցուցահանդեսի պաշտոնական բացման արարողությանը նախորդել է «Համազգային» մշակութային կենտրոնի Սալոնիկի մասնաճյուղի կողմից կազմակերպված գրական-մշակութային միջոցառում «Հոգու տողեր, Հայաստանի տողեր» խորագրով' սալոնիկահայ երիտասարդության մասնակցությամբ: Սալոնիկի քաղաքային թատրոնի դերասան Մանոլիս Ֆուդուլիսի բեմադրությամբ, Կոմիտասի կատարումների ներքո Արաքսյա Գանապետյանը, Անժել Երամյանը, Վիգեն Դերեյանը, Անահիտ և Մելին Քարաօղլանյանները, Մարի Քյուրքչյանը, Ռոզա Փափազյանը և Տիգրան Սարգսյանը ներկայացրել են 19-րդ և 20-րդ դարերի հայ պոեզիայի ամփոփ նկարագիրը, ընթերցել են Խաչատուր Աբովյանի, Սիամանթոյի, Դանիել Վարուժանի՝ հունարեն թարգմանված ստեղծագործություններից:

Միջոցառմանը ներկա են եղել Հունաստանում ՀՀ դեսպան Գագիկ Ղալաչյանը, հունահայ համայնքային և կրոնական կառույցների ղեկավարներ և ներկայացուցիչներ, ինչպես նաև ցուցահանդեսի բազմաթիվ հույն և օտարազգի այցելուներ:

Հայկական տաղավարը մեծ հետաքրքություն է առաջացրել ինչպես ցուցահանդեսի այցելուների, այնպես էլ հրատարակիչ ընկերությունների մոտ: Հայկական մշակութային միջոցառումն ընդգրկվել է ցուցահանդեսի շրջանակում անցկացված լավագույն միջոցառումների շարքում և լայնորեն լուսաբանվել հունական լրատվամիջոցների կողմից: