Մահացել է դրամատուրգ Ռուբեն Սանոյանը

Կյանքի 83-րդ տարում մահկանացուն է կնքել դրամատուրգ, գրաքննադատ Ռուբեն Սանոյանը:

Ռուբեն Սանոյանի քաղաքացիական հոգեհանգիստը տեղի կունենա մայիսի 13-ին՝ ժամը 18:00-ին, Նոր Նորքի 2-րդ զանգված, Գյուրջյան 10 հասցեի «Սգո սրահ»-ում: Վերջին հրաժեշտը' մայիսի 14-ին՝ ժամը 12:00-13:00 նույն «Սգո սրահ»-ում:

Ռուբեն Սանոյանը ծնվել է 1933թ. հունվարի 27-ին, Լենինականում (այժմ Գյումրի): 1958թ. ավարտել է Լենինգրադի պետական համալսարանի փիլիսոփայության ֆակուլտետը: 1958-1964թթ. աշխատել է ՀՀ ԳԱԱ Մ. Աբեղյանի անվան գրականության ինստիտուում, 1964- 1970թթ. ՀՀ ԳԱԱ փիլիսոփայության սեկտորում: 1970-ից Արևմտյան թատրոնի պատմություն է դասախոսել Երևանի գեղարվեստաթատերական ինստիտուտում: Գրողների միության անդամ է 1970 թվականից: Բազմաթիվ պիեսների հեղինակ է, որոնք, ինչպես և թատրոնի պատմությանը, թատերագիտության խնդիրներին վերաբերող նրա հոդվածները, իրենց գեղարվեստական և գիտական մակարդակով արժանացել են հանդիսատեսի և մասնագետների բարձր գնահատականին:

Նրա «Հայրիկները, մայրիկները, բալիկները» (1965թ.), «Բարդիները լուռ,» (պիեսների ժողովածու, 1986թ.), «Ընթրիք նեղ շրջանակում» (1985թ.), «Մեծ բիթլիսցու առեղծվածը» (ռուսերեն' 1998թ.և 2004-ին' հայերեն), «Դրամատուրգ, ռեժիսոր, քննադատ» (ռուսերեն հոդվածների ժողովածու, 1987թ.) և այլ դրամաներն ու հրապարակումները նշանակալի ներդրում են հայ թատերարվեստի բնագավառում: Ռուբեն Սանոյանի «Ախ, մայրիկ, մայրիկ» (1964թ.) և «Վայրենին» պիեսներն արժանացել են ՀԳՄ և Մշակույթի նախարարության մրցանակի:

Ազնիվ, իր առաքելությանը նվիրված արվեստագետի, մարդու և ընկերոջ հիշատակը դեռ երկար կապրի նրան ճանաչողների և գնահատողների սրտերում: