Ինտեգրված բաց դասերը նվիրված էին Հայոց ցեղասպանության մեկդարյա տարելիցին

Սևան քաղաքի Մեսրոպ Մաշտոցի անվան N1 հիմնական դպրոցում ապրիլի 17-ից մեկնարկեցին ինտեգրված բաց դասերը՝ նվիրված Հայոց ցեղասպանության մեկդարյա տարելիցին:

Ինչպես «Արմենպրես»-ին պատմեց դպրոցի տնօրեն Արմենուհի Նիկողոսյանը՝ բաց դասեր անցկացվեցին «Մաթեմատիկա», «Կենսաբանություն», «Գրականություն», «Պատմություն», «Օտար լեզու», «Աշխարհագրություն», «Հայոց եկեղեցու պատմություն», «Հասարակագիտություն», «Երաժշտություն» առարկաներից: Մաթեմատիկայի դասի ժամանակ աշակերտները լուծեցին ֆունկցիաներ և, օգտագործելով տառերի թվային արժեքը, ստացան «Հիշում եմ և պանաջում» նշանաբանը, նշեցին, թե որ երկրում հիմա քանի հայ է ապրում, հաշվեցին, թե որքան կկազմեր այժմ հայ բնակչությունը, եթե չլիներ ցեղասպանությունը:

«Կենսաբանության» դասին ներկայացվեց անմոռուկ ծաղիկի կառուցվածքը, օգտակար նշանակությունը, նաև բացատրվեց անմոռուկի նշանակությունը՝ որպես Մեծ եղեռնի զոհերի հիշատակման խորհրդանիշ: Խոսվեց համաճարակների, հիվանդությունների մասին, որոնք առաջացան պատերազմի պատճառով: Քննարկվեցին և համեմատվեցին հայկական և թուրքական գեները, կատարվեց եզրակացություն:

Դասը շարունակեց հոգեբանը. նա խոսեց որբերի հոգեբանության մասին: Պատմության դասի ժամանակ աշակերտները լսեցին 1914-1915 թվականների քաղաքական իրավիճակի, պատմական իրադարձությունների և զարգացումների մասին, բեմադրվեց Սողոմոն Թեհլերյանի դատավարությունը, ցուցադրվեց համապատասխան տեսանյութ: Օտար լեզվի բաց դասերի ժամանակ աշակերտները ռուսաց լեզվով, անգլերենով, գերմաներենով և ֆրանսերենով ներկայացրին թուրքերի կողմից իրականացրած ցեղասպանությունը և դատապարտեցին այն: Դիտեցին տեսահոլովակներ Հայաստանի և տարբեր երկրների համագործակցությա ն մասին, նշվեցին այն երկրները, ԱՄՆ-ի այն նահանգները, որոնք ճանաչել են ցեղասպանությունը:

Խոսվեց նաև բոլոր օտարազգի այն անվանի մարդկանց մասին, ովքեր մեծ ներդրում են ունեցել Հայկական հարցի լուծման գործում: Դասը շարունակեց «Հասարակագիտություն» առարկայի ուսուցչուհին, ով խոսեց մարդկանց իրավունքների և դրանց ոտնահարման մասին՝ Թուրքիայից պահանջելով ցեղասպանության ճանաչում և արժանի հատուցում: «Աշխարհագրություն», «Հայոց եկեղեցու պատմություն», «Երաժշտություն» առարկաների բաց դասերին աշակերտները հիշատակեցին այն քաղաքների, գյուղերի անունները, որոնք հայաթափվեցին և ավերվեցին, քարտեզի վրա ցույ ց տվեցին այն երկրները, որտեղ ապաստանեցին եղեռնից փրկված հայերը և ստեղծեցին հայկական սփյուռքը: Տեսանյութերի միջոցով ցուցադրվեցին այն եկեղեցիները, որոնք մնացին թուրքերի ձեռքում և ավերվեցին: Հիշատակվեցին այն հոգևորականների անունները, ովքեր զոհ գնացին թուրք մարդասպաններին, հնչեց աղոթք նրանց համար: Իսկ Կոմիտասի մասին կենսագրական տեղեկությունները, հետաքրքիր տեսանյութը, կոմիտասյան երգն ու երաժշտությունը հուզեցին բոլոր ներկաներին: Գրականության բաց դասը սկսվեց Տերունական աղոթքով: Դասին «ներկա էին» նաև Մամփրե արքան, Խ. Աբո վյանը, Գ. Զոհրապը, ովքեր աշակերտներին «հորդորեցին» աչքի լույսի պես պահել հայոց սուրբ տառերը, հավատը, արյան գնով պաշտպանել հայրենիքը:

Անմոռուկի վրա փակցվեցին եղեռնին զոհ գնացած գրողների նկարները, ներկայացվեցին տեղեկություններ նրանց մասին: Աշակերտները ներկայացրին 1915 թվականի պատմական իրադարձությունները, դատապարտեցին պատերազմը, արժևորեցին խաղաղությունը և իրենց ասմունքով ու խոսքով ցույց տվեցին, որ հայ ժողովրդի արժանի զավակներն են: Դասն ավարտվեց Դանիել Դեքերի և Արա Գևորգյանի «Ադանա» երգով:

Բաց դասերի եզրափակմանը բեմադրվեցին հատվածներ Պ. Զեյթունցյանի «Վերջին արևագալը» գրքից, աշակերտները ասմունքեցին Հ. Շիրազի «Հայոց դանթեական»-ից, Դ. Վարուժանի, Սիամանթոյի, Ռ. Սևակի ստեղծագործություններից:

Բաց դասերին ներկա էին Գեղարքունիքի մարզպետարանի ԿՄՍ վարչության պետ Գարիկ Բադալյանը, Գեղարքունիքի մարզպետարանի ԿՄՍ վարչության կրթության բաժնի մասնագետ Գոհար Մալխասյանը, Սևանի քաղաքապետարանի աշխատակիցներ, դպրոցների տնօրեններ: