«Պետք է ամեն ինչ արվի լարվածությունը ցածր մակարդակի վրա պահելու համար». Սեյրան Օհանյան

Հայաստանի և Ադրբեջանի նախագահների կամ արտգործնախարարների՝ Ռիգայում ակնկալվող հանդիպումից ՀՀ պաշտպանության նախարար Սեյրան Օհանյանի ակնկալիքը մեկն է` գործընթացը շարունակվի այն ուղով, որ հակամարտությունը կարգավորվի քաղաքական ճանապարհով, խաղաղ բանակցությունների արդյունքում:

«Տարածաշրջանային իրավիճակն ու շփման գծում հրադադարի պարբերաբար խախտումները թույլ են տալիս ասելու, որ մենք պետք է շարունակենք այն գործընթացը, որ հակամարտության խնդիրը լուծվի խաղաղ և քաղաքական ճանապարհով: Այս հարցով ցանկացած քաղաքական հանդիպման ակնկալիքը այն է, որ հարցը լուծվի հավասար, փոխադարձ հասկացողության և երկխոսության, շփման գծում վստահության մթնոլորտի ձևավորման պայմաններում: Ակնկալիքը սա է»,­-«Արմենպրես»­ի փոխանցմամբ՝ Նոյեմբերյանի զորամասերից մեկում կայացած ասուլիսի ժամանակ նշեց Սեյրան Օհանյանը՝ հավելելով, որ հայկական կողմի ցանկությունը մեկն է՝ հարևաններն էլ հասկանան, որ պետք է ամեն ինչ արվի լարվածությունը ցածր մակարդակի վրա պահելու համար: