«Թանգարանների գիշեր». 111 թանգարան և բազմաթիվ ուշագրավ միջոցառումներ

Գիտություն և Մշակույթ 15 Մայիս, 2015 10:47

111 մասնակից թանգարան, բազմաթիվ հետաքրքիր և յուրահատուկ միջոցառումներ, ցուցադրություններ:

«Թանգարանների գիշեր» համաեվրոպական միջոցառումն այս տարի ևս կհամախմբի մշակութասեր հանրությանը: Տարբեր մշակութային օջախներում մայիսի 16-ին սպասվում են մի շարք միջոցառումներ, որոնց նպատակը թանգարան-այցելու կապն ամրապնդելն է և հասարակության ուշադրությունը գրավելը: Այս տարի «Թանգարաններ. հիշողության վկաներ» խորագրի ներքո անցկացվող միջոցառումները կանդրադառնան Հայոց ցեղասպանության 100-րդ տարելիցին:

«Արդեն 11 տարի արվեստասեր հասարակությունը ոգևորությամբ է սպասում «Թանգարանների գիշեր» ծրագրի շրջանակում իրականացվող ձեռնարկումներին՝ակնկալելով նախորդ տարիների միջոցառումներին գերազանցող նոր իրադարձություններ: «Թանգարանների գիշերի» շնորհիվ մեր մշակութային օջախներն ավելի մոտեցան հանրությանը, դարձան մտերմիկ և անկաշկանդ շփումների, մեր ազգային արժեքներին հաղորդակցվելու հարազատ վայր»,- «Թանգարանների գիշեր»-ին ընդառաջ իր ուղերձում նշել է ՀՀ մշակույթի նախարար Հասմիկ Պողոսյանը:

«Արմենպրես»-ը, ուսումնասիրելով միջոցառումների ցանկը, առանձնացրել է այն կարևոր իրադարձությունները, որոնք տեղի կունենան մայիսի 16-ին:

Հայաստանի պատմության թանգարանում այդ օրը կկայանա «Գորգի վիրտուալ թանգարան» կայքէջի շնորհանդեսը: Ազգային պատկերասրահն էլ կներկայանա Հայոց ցեղասպանության տարելիցին նվիրված «Վկայություն» ցուցահանդեսով. այդ օրը ՀԱՊ-ում կանցկացվեն նաև համերգներ: Կոմիտասի թանգարան-ինստիտուտն էլ կներկայացնի Ռուբեն Գալիչյանի «Հայացք Հայաստանի պատմությանը քարտեզագրական փաստաթղթերի միջոցով» ցուցահանդեսը: Մայիսի 16-ին մշակութային օջախում նախատեսված են այլ իրադարձություններ՝ հանդիպում և համերգ:

Ե. Չարենցի անվան գրականության և արվեստի թանգարանը կցուցադրի 1894-1923 թթ. գրված և Հայոց ցեղասպանությունը փաստող անպատասխան նամակներին հայ և օտարազգի անվանի գործիչների պատասխան-արձագանքները՝ տեսաշարով: Միջոցառումը կրում է «Պատասխան 100 տարի անց» խորագիրը:

Երևան քաղաքի պատմության թանգարանը կներկայանա «Հիշում եմ և պահանջում. Վերածնունդ» ցուցահանդեսով: Ա. Խաչատրյանի տուն-թանգարանում այցելուները կնկարեն Խաչատրյանի երաժշտության ներքո, իսկ Հ. Թումանյանի թանգարանում կդիտեն «Ամենայն որբերի հայրիկը» ինստալացիան:

Ալ. Սպենդիարյանի տուն-թանգարանն այցելուներին կոմպոզիտորի բաղադրատոմսով պատրաստված կակաո կբաժանի, իսկ Ավ. Իսահակյանի տուն-թանգարանում կդիտեն Վերժինե Սվազլյանի գերդաստանի գործունեության մասին տեսաֆիլմ: Ռուսական արվեստի թանգարանն էլ հանրությանն առաջարկում է դիտել «Կորուսյալ հայրենիք. լուռ վկաներ» խորագրով լուսանկարների ցուցահանդեսը:

Ե. Չարենցի տուն-թանգարանը «Դանթեական առասպել» պոեմի քառալեզու հրատարակության շնորհանդեսը կկազմակերպի: Մայիսի 16-ին մշակութային այլ օջախներում ևս կկազմակերպվեն միջոցառումներ. դրանց որոշ մասը «Թանգարանների գիշերին» կմիանան իրենց մշտական ցուցադրություններով: Այլ միջոցառումներ կկազմակերպվեն նաև մարզային և Արցախի թանգարաններում:

Ֆրանսիայի մշակույթի նախարարության նախաձեռնությամբ, Եվրոպայի խորհրդի և ՅՈՒՆԵՍԿՕ-ի հովանավորությամբ ամեն տարի մայիսին անցկացվում է «Թանգարանների գիշեր» համաեվրոպական միջոցառումը: Հայաստանյան թանգարաններն այս միջոցառմանը մասնակցում են 2005 թվականից: