Բոլոնյան գործընթացի մասին Երևանի կոմյունիկեն միաձայն ընդունվեց. թարմացված (տեսանյութ)

Եվրոպական բարձրագույն կրթական տարածքի (ԵԿԲՏ) նախարարական գագաթաժողովի ու Բոլոնիայի գործընթացի 4-րդ քաղաքական ֆորումի եզրափակիչ նիստում մասնակիցները միաձայն հաստատել են երևանյան կոմյունիկեն և Բոլոնիայի գործընթացի 4-րդ քաղաքական ֆորումի հռչակագիրը: «Արմենպրես»-ի փոխանցմամբ, ամփոփիչ նիստին, որը վարել է ՀՀ կրթության և գիտության նախարար Արմեն Աշոտյանը, ներկա է եղել նաև ՀՀ վարչապետ Հովիկ Աբրահամյանը:

ԵԿԲՏ նախարարական կոմյունիկեում առաջին անգամ ամրագրվել է կոնֆլիկտային տարածքներում ուսանողների շարժունության և կրթության իրավունքի հարցը, որը շրջադարձային սկզբունք է համաեվրոպական կրթական քաղաքականության համատեքստում: Դրանում նշվում է, որ մինչև 2020 թվականը նախատեսվում է նվաճել այնպիսի ԵԲԿՏ, որտեղ համընդհանուր նպատակները կիրառվում են բոլոր անդամ երկրներում' «ապահովելով փոխադարձ վստահություն միմյանց բարձրագույն կրթական համակարգերում, որտեղ որակավորումների ավտոմատ ճանաչումը իրականություն է' թույլ տալով ուսանողներին և շրջանավարտներին ազատ տեղաշարժվել, որտեղ բարձրագույն կրթությունը նպաստում է կառուցել ընդգրկուն հասարակություն՝ հիմնված ժողովրդավարական արժեքների և մարդկային իրավունքների վրա, և որտեղ կրթական հնարավորությունները տրամադրում են եվրոպական քաղաքացիության, նորարարության և աշխատանքի հնարավորության համար անհրաժեշտ կարողություններ և հմտություններ»: «Մենք խթանելու ենք բարձրագույն կրթության սոցիալական ուղղվածությունը և բարելավելու ենք կրթության հասանելիության և ավարտելու հնարավորությունները' ներառյալ միջազգայի ն շարժունությունը անապահով խավի ուսանողների համար: Հակամարտությունների գոտիներում բնակվող ուսանողներին և աշխատակազմին մենք կտրամադրենք ազատ տեղաշարժվելու հնարավորություն' ապահովելով նրանց տունդարձը համապատասխան պայմանների առկայության դեպքում: Մենք նաև ցանկանում ենք խթանել դասավանդող ուսանողների ազատ տեղաշարժը' հաշվի առնելով նրանց ունեցած կարևոր դերակատարումը եվրոպական ազգերի գալիք սերունդների ուսուցանման գործում»,- ասվում է կոմյունիկեի տեքստում:

Միջոցառման ավարտին ընդունված հայտարարգրի մեջ նշվում է, որ Բոլոնիայի 4-րդ քաղաքական ֆորումի անկյունաքարը ԵԲԿՏ-ի, ՄԱՀԱԱՍ-ի (Մերձավոր Արևելք, Հյուսիսային Աֆրիկա, Ասիա) և սահմանակից երկրների միջև համագործակցության ամրապնդումն է: «Կարևոր է այն վստահության ամրագրումը, որ բարձրագույն կրթությունը պատրաստ է առերեսվել արդի մարտահրավերներին: Բարձրագույն կրթության բարեփոխումները կբարելավեն բարձրագույն կրթության որակը և կնպաստեն գործազրկության կրճատմանը՝ երիտասարդների՝ հատկապես կանանց շրջանում»,- ասվում է հայտարարագրի տեքստում:

Աշոտյանը հայտարարել է, որ Երևանյան գագաթաժողովւոմ Բոլոնիայի քարտուղարության ղեկավարման էստաֆետը փոխանցվում է Ֆրանսիային, որտեղ էլ կկայանա 2018 թվականի նախարարական գագաթնաժողովը: