Էդ Ռոյսն ու Ֆրենք Փալոնեն ողջունել են ԱՄՆ - Հայաստան առևտրի համաձայնագրի ստորագրումը

ԱՄՆ Ներկայացուցիչների պալատի արտաքին հարաբերությունների հանձնաժողովի նախագահ Էդ Ռոյսը և ԱՄՆ Կոնգրեսի՝ հայկական հարցերով հանձնախմբի համանախագահ Ֆրենք Փալոնեն առաջին կոնգրեսականներից էին, ովքեր ողջունել են Միացյալ Նահանգների և Հայաստանի միջև մայիսի 7-ին Առևտրի և ներդրումների շրջանակային համաձայնագրի ստորագրումը: Ինչպես հաղորդում է «Արմենպրես»-ը, Հայ դատի ԱՄՆ հանձնախումբը գրում է, որ Ռոյսը համաձայնագրի ստորագրումից անմիջապես հետո գրառում էր կատարել «Թվիթեր»-ի իր միկրոբլոգում՝ նախ գոհունակությունը հայտնելով կատարվածի առնչությամբ, ապա նաև կարևորություն տալով այն հեռանկարներին, որոնք ի հայտ են եկել երկու երիկրների միջև առևտրի և ներդումների ոլորտում:

Կոնգրեսական Ֆրենք Փալոնեի համոզմամբ՝ համաձայնագրի ստորագրումը երկու երկրի փոխադարձ զարգացման գործում համընդհանուր հետաքրքրվածության ապացույցն է: «Հայաստանը մշտապես եղել է ԱՄՆ-ի հպարտ դաշնակիցը, և ես ուրախ եմ, որ մենք գրանցել ենք առաջընթաց, որը կաջակցի երկու կողմերի աշխատողներին»,- ասել է Փալոնեն:

ՀՀ արտգործնախարար Էդվարդ Նալբանդյանը և ԱՄՆ առևտրի ներկայացուցչի տեղակալ Դեն Մուլանին՝ ՀՀ Նախագահի ներկայությամբ, մայիսի 7-ին ստորագրել են Հայաստանի Հանրապետության և Ամերիկայի Միացյալ Նահանգների միջև Առևտրի և ներդրումների շրջանակային համաձայնագիրը։ Ըստ փաստաթղթի՝ կողմերը հավաստում են իրենց մտադրությունը՝ ստեղծելու բարենպաստ պայմաններ ներդրումների և երկու երկրների միջև ապրանքաշրջանառության, առևտրի խրախուսման համար։

Նախատեսվում է ձևավորել Առևտրի և ներդրումների հայ-ամերիկյան խորհուրդ, որի հանդիպումներն անց են կացվելու առնվազն տարին մեկ անգամ։ Խորհուրդը կոչված է՝ բացահայտելու երկկողմ ներդրումների և առևտրի նոր ոլորտներ և աշխատանքներ տանելու դրանց զարգացման ու այդ ճանապարհին հնարավոր խոչընդոտների վերացման ուղղությամբ։