Հայաստանում մահացության պատճառների գերակշիռ մասը սրտանոթային հիվանդություններն են

Հայաստանում մահացությունների 80 տոկոսը բաժին է ընկնում ոչ վարակիչ հիվանդություններին: Դրանցից առաջին տեղում են սրտանոթային հիվանդությունները՝ 48 տոկոս, չարորակ նորագոյացությունները՝ 20,8 տոկոս, և շաքարային դիաբետը՝ 4,7 տոկոս: Այս մասին մայիսի 15-ին ոչ վարակիչ հիվանդությունների կանխարգելմանն ու վերահսկմանն ուղղված սկրինինգային ծրագրի առաջին արդյունքների ներկայացման ժամանակ ասաց ՀՀ ԱՆ Առողջապահական ծրագրերի տնօրեն Նելսոն Զուլոյանը: «Հետազոտությունները փաստեցին, որ Հայաստանում մահացության պատճառներում գերակշռողը ոչ վարակիչ հիվանդություններն են, իսկ սրտանոթային հիվանդությունները մահվան 48 տոկոս դեպքերի պատճառ են դառնում»,- ասաց Զուլոյանը:

ՀՀ առողջապահության փոխնախարարն ընդգծեց, որ սկրինինգային ծրագիրը խիստ համահունչ է Առողջապահության նախարարության' բնակչության առողջության պահպանման քաղաքականությանը, որոնց առաջնային նպատակն է հիվանդության կանխարգելումը, առողջ ապրելակերպի քարոզումը և հիվանդությունների վաղ հայտնաբերումը: «Մենք ավելի շատ կարևորում ենք հիվանդությունների վաղ հայտնաբերումը, քանի որ այդ ժամանակ հնարավոր է դառնում իրականացնել միջոցառումներ, որոնք ավելի հեշտ են թույլ տալիս լուծելու առողջապահական խնդիրները և պահպանելու մարդկանց առողջությունը: Վերջին երկու տարվա ընթացքում մենք շատ էինք խոսում սկրինինգային ծրագրի մասին, սակայն այժմ եկել է պահը ներկայացնելու աշխատանքների նախնական արդյունքները»,- ասաց փոխնախարար Սերգեյ Խաչատրյանը:

Այս տարվա սկզբից մեկնարկած սկրինինգային հետազոտությունների շրջանակներում մինչ օրս Հայաստանում կատարվել է 7150 ՊԱՊ թեստի (Պապանիկոլաուի թեստ) հետազոտություն, որն օգտագործվում է արգանդի պարանոցի կամ վզիկի նախաչարորակ և չարորակ ընթացքները հայտնաբերելու համար, իսկ շուրջ 56000 քաղաքացիների մոտ որոշվել է արյան մեջ գլյուկոզայի մակարդակը:

«Զարկերակային գերճնշման և շաքարային դիաբետի ախտորոշման թիրախային խմբերում ընդգրկված են 35-68 տարեկան ՀՀ բոլոր քաղաքացիները, իսկ արգանդի պարանոցի նախաքաղցկեղի վաղ ախտորոշման և քաղցկեղի կանխարգելման թիրախային խմբում՝ 30-60 տարեկան բոլոր կանայք»,- ասաց Նելսոն Զուլոյանը' հիշեցնելով, որ նշված երեք հիվանդությունների հետազոտությունները ի սկզբանե անվճար կատարվում են պոլիկլինիկաներում և ամբուլատորիաներում:

Առողջապահական ծրագրերի տնօրենը նշեց, որ ծրագիրը եռամյա է և վերջում նախատեսվում է, որ հետազոտված կլինեն թիրախային բնակչության առնվազն 50-60 տոկոսը: «Այս ծրագրը շատ համահունչ է այն միտումներին, որոնք հիմա առկա են հատկապես զարգացած երկրներում, որովհետև ոչ մի երկրում գումարը չի հերիքի միայն բուժման համար, ինչի համար շեշտը դրվում է հիվանդությունների կանխարգելման կամ վաղ հայտնաբերման վրա: Հայաստանը նույնպես որդեգրել է այս ուղղությունը»,- ասաց Զուլոյանը: