Կաննի կինոփառատոնում առաջին անգամ հանձնվել է «Կանայք շարժման մեջ» պարգևը

Ամերիկացի կինոաստղ Ջեյն Ֆոնդային Կաննի կինոփառատոնի պատմության մեջ առաջին անգամ հանձնվել է «Կանայք շարժման մեջ» ("Women in Motion") պարգևը, որը սահմանվել է այս տարի, տեղեկացնում է «Արմենպրես»-ը՝ հղում անելով «Ինտերֆաքսին»:

Կաննի փառատոնի նախագահ Պիեռ Լեսքյուրի խոսքով՝ պարգևը սահմանվել է կինոինդուստրիայի կին ականավոր ներկայացուցիչների խրախուսման համար: «Այս նոր պարգևը հարգանքի նշան կդառնա կինեմատոգրաֆի ասպարեզում կանանց նվաճումների նկատմամբ»,- հայտարարել է Լեսքյուրը՝ հանձնելով պարգևը:

Նա նաև նշել է Ֆոնդայի ավանդը հանուն կանանց իրավունքների պայքարի բնագավառում: «Մենք այս պարգևը Ջեյն Ֆոնդային ենք հանձնում ոչ միայն կինեմատոգրաֆի բնագավառում նրա ակնառու նվաճումների, այլև հանուն խաղաղության և կանանց հավասարության բազմամյա աշխատանքի համար»,- նշել է փառատոնի նախագահը:

Ֆոնդայի հետ մեկտեղ պարգև են ստացել նաև պրոդյուսեր Մեգան Էլիսոնը և դերասանուհի Օլիվիա դե Հևիլենդը՝ Կաննի փառատոնի պատմության մեջ ժյուրիի առաջին կին նախագահը (1965):

Կաննի 68-րդ փառատոնն այս օրերին ընթանում է Ֆրանսիայում: Այն կտևի մինչև մայիսի 24-ը: