ԱԺ այգու 50 ծառատեսակներին միացած սակուրաները կխորհրդանշեն հայ- ճապոնական բարեկամությունը

Ազգային ժողովի այգում Ճապոնիա-Հայաստան ընկերակցության նախաձեռնությամբ և հայ-ճապոնական պատգամավորական բարեկամական խմբի աջակցությամբ տնկվեցին 5 սակուրաներ: Հայ-ճապոնական պատգամավորական բարեկական խմբի ղեկավար, ՀՀԿ-ական պատգամավոր Սամվել Ֆարմանյանը նշեց, որ Հայաստանի ու Ճապոնիայի համար խորհրդանշական այս տարում սակուրաների տնկումը խորհրդանշում է հայ-ճապոնական հարաբերությունների բարեկամական բնույթն ու դրանց հետայսու զարգացման անհրաժեշտությունը: «Տարին խորհրդանշական է, հայ ժողովուրդն այս տարի ոգեկոչում է Հայոց ցեղասպանության 100-րդ տարելիցը, այն իր մեջ խորհրդանշում է վերածնունդի գաղափարը, ինչպես սակուրա ծառը: Տարին խորհրդանշական է մեր բարեկամ ճապոնացի ժողովրդի համար, այս տարի օգոստոսին լրանում է Հիրոսիմայի ու Նագասակիի ռմբակոծման 70-րդ տարելիցը, որին հաջորդած տարիները ևս եկան խորհրդանշելու ճապոնացիների վերածնունդը և նրանց նոր դերակատարությունն աշխարհում»,-«Արմենպրես»-ի հաղորդմամբ' ասաց պատգամավորը:

Նրա խոսքով' միջոցառումը նաև շնորհակալության խոսք է Հայաստանում իր դիվանագիտական առաքելությունն ավարտող ՀՀ-ում Ճապոնիայի դեսպան Չիկահիտո Հարադային: «Այս կերպ մենք մեր երախտիքի խոսքն ասացինք նրա ջանքերի համար, որի արդյունքում բացվել է Ճապոնիայի դեսպանությունը Հայաստանում: Վաղը մեր խորհրդարանական պատվիրակությունն աշխատանքային այցով մեկնելու է Տոկիո, ինչը հաստատում է մեր վճռականությունը զարգացնելու երկու բարեկամ ժողովուրդների միջև կապերը»,-ավելացրեց Սամվել Ֆարմանյանը:

Հայաստանում Ճապոնիայի դեսպան Չիկահիտո Հարադան էլ շեշտեց, որ Ճապոնիայի խորհրդանիշ համարվող սակուրա ծառն աճելով ցույց կտա հայ-ճապոնական հարաբերությունների բարգավաճումը: «Սակուրան Ճապոնիայի խորհրդանիշ ծաղիկն է, ինչը կարող է ավելի լավ խորհրդանշել հայ-ճապոնական բարեկամությունը, այն տնկվում է Հայաստանի Ազգային ժողովի այգում, ինչն էլ հայ ժողովրդի խորհրդանիշն է իր հերթին»,-նշեց դեսպանը:

Նրա խոսքով' ծառատունկը, որին մասնակցում է, իր վերջին միջոցառումն է Հայաստանում, քանի որ հունիսի 1-ից դեսպանի պարտականություններն ստանձնելու է մեկ այլ դեսպան' Էյջի Տագուչին: «Հուսով եմ, որ նա նույն ջանասիրությամբ կկատարի իր առաքելությունը Հայաստանում, նրան շատ լավ ճանաչում եմ ու վստահ եմ այդ հարցում: Վստահ եմ, որ, ռեզիդենտ դեսպանի Հայաստան գալով, կունենանք ավելի սերտ համագործակցություն տարբեր ասպարեզներում ու կկարողանանք ավելի զարգացնել Ճապոնիա-Հայաստան փոխգործակցությունը»,-ավելացրեց նա:

Դեսպանն ընդգծեց, որ չի խզելու հարաբերությունները Հայաստանի հետ, այլ այստեղից հեռանում է' հայ ժողովրդի ու Հայաստանի բարեկամը լինելով: