Analitik.am կայքը կիբեռհարձակման է ենթարկվել Խաչատուր Սուքիասյանի պատվերո՞վ

Analitik.am լրատվական կայքը ենթարկվել էր հաքերային հարձակման, և երեք օր է՝ խաթարվել էր կայքի բնականոն աշխատանքը։ Խնդրի մանրամասներին ծանոթանալու համար ԼՈՒՐԵՐ.com-ը զրուցել է կայքի գլխավոր խմբագիր Անի Հովհաննիսյանի հետ։

- Analitik.am-ը մոտ երեք օր չէր գործում, ի՞նչն էր խնդիրը, ի՞նչ էր պատահել։

- Կայքը ենթարկվել էր հաքերային DdoS հարձակման: Մեզ, իհարկե, հաջողվեց վերականգնել կայքի աշխատանքը, սակայն հարձակումը շարունակվում է, ինչպես նաև ձեռնարկվեցին համապատասխան քայլեր: Արդեն դիմել ենք ոստիկանության կազմակերպված հանցավորության դեմ պայքարի գլխավոր վարչության (6-րդ վարչություն) կիբեռհանցագործությունների բաժին։

- Արդյոք կա՞ որևէ մեկը, ում կասկածում եք հաքերային հարձակումն անելու կամ պատվիրելու մեջ։

- Վերջին շրջանում Analitik.am-ը բացահայտեց գործարար Խաչատուր Սուքիասյանի՝ Օղակաձև զբոսայգում հյուրանոց կառուցելու ծրագրերը և համապատասխան հրապարակումներ եղան այդ թեմայով։ Կայքի նկատմամբ հարձակում կազմակերպելու օրը նույնպես Խաչատուր Սուքիասյանի մասին հոդված էր տեղադրվել, ինչից մի քանի ժամ անց սկսվեց հարձակումը, որը մինչ այս պահն էլ դեռ շարունակվում է։ Վստահ եմ՝ իրավապահ մարմինները կձեռնարկեն բոլոր անհրաժեշտ միջոցները, և մեղավորները կպատժվեն։

- Կայքը վերականգնվելուց հետո մոտեցումները նույն կերպ շարունակվելո՞ւ են, թե՞ ամեն դեպքում այս հարձակումը որևէ բան կփոխի։

- Analitik.am-ը շարունակելու է մանրամասն ուսումնասիրությունների շարքը բոլոր այն անձանց և թեմաների հետ կապված, որոնց անդրադարձ է կատարվել մեր էջերում։