Քաղաքական ուժերի հետ սահմանադրական բարեփոխումների բովանդակային քննարկումները տեղի կունենան հունիսին

Սահմանադրական բարեփոխումների հանձնաժողովը հունիսի սկզբին բովանդակային քննարկումներ կունենա ՀՀ քաղաքական ուժերի հետ' սահմանադրական բարեփոխումների նախագծի դրույթների, այդ թվում' կառավարաման համակարգի նոր մոդելի վերաբերյալ: «Արմենպրես»-ի փոխանցմամբ' այս մասին լրագրողների հետ հանդիպմանն ասաց Սահմանադրական դատարանի նախագահ Գագիկ Հարությունյանը: «Հանձնաժողովը ենթադրում է, որ այս քննարկումների արդյունքներով ի վիճակի կլինի պաշտոնական տեղեկատվություն ներկայացնել Վենետիկի հանձնաժողովի լիագումար նիստին, որը կկայանա հունիսի 18-19-ին: Այնտեղ ես պետք է տեղեկատվություն ներկայացնեմ ընթացքի վերաբերյալ»,- ասաց ՍԴ նախագահը:

Գագիկ Հարությունյանը հիշեցրեց, որ ՀՀ Նախագահ Սերժ Սարգսյանը քաղաքական կուսակցությունների հետ խորհրդակցություններից հետո հավանություն տվեց սահմանադրական բարեփոխումների հայեցակարգին' միայն այն նկատառումով, որ գտնվեն լուծումներ ներքին և արտաքին անվտանգության երաշխիքների ու կառավարման կայունության ապահովման հարցերում:

«Հայեցակարգը ներկայացնելիս մենք նշել էինք, որ երկրի քաղաքական ուժերի միջև անհրաժեշտ քաղաքական փոխհամաձայնության պարագայում նշված խնդիրների համարժեք լուծումներ կարող են գտնվել կառավարման խորհրդարանական համակարգի ներդրման պայմաններում, ինչն առավելապես քաղաքական ընտրության խնդիր է: Եվ այս խնդրին վերջնական լուծում տալու համար, նաև նախագահի առաջարկով, մենք փորձեցինք գտնել ոչ միայն անվտանգության և ապահավության կայանության երաշխիքներ, այլև քննարկումներ սկսել քաղաքական կուսակցությունների հետ»,- ասաց Հարությունյանը:

Նա տեղեկացրեց, որ սահմանադրական բարեփոխումների հանձնաժողովը կհաստակեցնի իր դիրքորոշումը այս հիմնարար հարցերի վերաբերյալ մայիսի 28-29-ին նախատեսվող հանդիպումների ժամանակ, իսկ հունիսին' մինչև 12-ն արդեն հանդիպումներ կունենա այն քաղաքական ուժերի հետ, որոնք բովանդակային քննարկումներ անցկացնելու ցանկությամբ են հանդես եկել: Նման հայտ է ներկայացրել 14 կուսակցություն:

Հարությունյանի խոսքով' նախկինում երկու հանդիպում եղել է Հայ հեղափոխական դաշնակցություն կուսակցության և Ազգային ինքնորոշում միավորման ներկայացուցիչների հետ: Առանձին հանդիպում է տեղի ունեցել նաև «Բարգավաճ Հայաստան» կուսակցության ներկայացուցչի հետ, որի ընթացքում կուսակցությունը դիրքորոշում է հայտնել, որ կմասնակցի բովանդակային քննարկումների միայն այն բաժիններին, որոնք չեն առնչվում կառավարման համակարգին: