Մարտին Սկորսեզեն ավարտել է ըստ ճապոնացի գրող Սյուսակու Էնդոյի վեպի «Լռություն» ֆիլմի նկարահանումները

Ամերիկացի հանրաճանաչ ռեժիսոր Մարտին Սկորսեզեն ավարտել է «Լռություն» ֆիլմի նկարահանումները՝ ըստ ճապոնացի նշանավոր գրող Սյուսակու Էնդոյի համանուն վեպի: Այդ մասին, ինչպես տեղեկացնում է «Արմենպրես»-ը, հաղորդել է Variety շաբաթահանդեսը:

Սկորսեզեն դեռ 1992 թվականին էր ստեղծել կինոնկարի սցենարը, բայց ամենատարբեր պատճառներով ոչ մի կերպ չէր կարողանում ձեռնամուխ լինել նախագծի իրականացմանը: Դրանցից մեկն այն էր, որ պրոդյուսերներին չէր հաջողվում փող գտնել ֆիլմի համար, որը կինոստուդիաների կողմից դիտարկվում էր որպես «ոչ առևտրային և չափից ավելի հեղինակային»:

1966 թվականին լույս տեսած Սյուսակու Էնդոյի վեպը վերաբերում է բարդագույն թեմայի՝ Աստծո և մարդու փոխհարաբերություններին և կատարված սխալների համար երկնային պատժի խնդիրներին: Դրա գործողությունը տեղի է ունենում 17-րդ դարում, երբ պորտուգալացի միսիոներ հոգևորականը ժամանում է Ճապոնիա և խոշտանգումների սպառնալիքի տակ հրաժարվում իր հավատից:

«Հեղինակի կողմից վեպում արծարծված հարցերն իմ մեջ եղել են վաղ մանկությունից, քանի որ ես դաստիարակվել եմ կաթոլիկ ընտանիքում և խորացել էի կրոնի մեջ»,-նշել է Սկորսեզեն:

Ֆիլմի նկարահանումներն արվել են Տայվանում: Հոգևորականի՝ Ֆերեյրայի դերը խաղացել է հյուսիսիռլանդացի դերասան Լիամ Նիսոնը: Ֆիլմի բյուջեն 50 մլն դոլար է:

Նախապես պլանավորվել էր, որ կինոնկարը վարձույթ դուրս կգա 2016 թվականին: «Սակայն Paramount Pictures կինոընկերությունը, որը ձեռք է բերել ԱՄՆ-ում ֆիլմի ցուցադրման իրավունքը, ցանկանում է արագացնել ֆիլմի թողարկումը և ծրագրում է այն ցուցադրել 2015 թվականի նոյեմբերին»,- գրում է Variety-ն, հաղորդել է ՏԱՍՍ-ը:

Լուսանկարը՝ AP