Ճապոնացի հնագետները համատեղ պեղումներ կիրականացնեն Հայաստանի տարածքում

Ճապոնացի մասնագետներն այս տարի ցանկություն են հայտնել առաջին անգամ հայ մասնագետների հետ համատեղ պեղումներ իրականացնել Հայաստանի սահմաններում: Պեղումներն իրականացվելու են Արարատյան դաշտի և Արագածի նախալեռնային շրջաններում արձանագրված մի շարք օբյեկտների ուսումնասիրության նպատակով, որոնք, ըստ երևույթին, կարող են տվյալներ տալ քարե դարի (մասնավորապես՝ նոր քարե դարի (նեոլիթ) և պղնձի-քարի դարի (էնեոլիթ) ժամանակների վերաբերյալ:

«Արմենպրես»-ի հետ զրույցում այս մասին հայտնեց Հնագիտության և ազգագրության ինստիտուտի տնօրեն Պավել Ավետիսյանը, ում խոսքովˋ նոր օբյեկտներն արձանագրված չեն եղել որպես հուշարձաններ և ներառված չեն հանրապետության հուշարձանների ցանկերում: «Ցանկանում ենք դաշտային հետազոտական աշխատանքներ կատարել և հասկանալˋ իսկապես մեր նախնական դիտարկումները արդարացվո՞ւմ են, արդյոք դրանք իսկապես հուշարձաննե՞ր են և ի՞նչ բնույթի հուշարձաններ»,- նշեց Ավետիսյանը:

Հայ-ճապոնական համատեղ ծրագիրն իրականացվում է Կանազավայի համալսարանի մասնագետների հետ:

2015 թվականի համար Հնագիտության և ազգագրության ինստիտուտը նախատեսել է ներկայացնել 28 հայտ այս տարի հանրապետության տարբեր մարզերում տարբեր ժամանակների 28 հուշարձանի պեղման և ուսումնասիրման աշխատանքներ կատարելու համար: Պեղումներ են նախատեսել նաև Մշակույթի նախարարության պատմամշակութային ժառանգության ուսումնասիրության կենտրոնըˋ մոտ 10 հայտ և Շիրակի երկրագիտական թանգարանն ու Գիտությունների ազգային ակադեմիայի Շիրակի հետազոտությունների կենտրոնը՝ մոտ 2-3 հայտ: Ինչպես տեղեկացրեց Պավել Ավետիսյանը, ներկայացված հայտերի բացարձակ մեծամասնությունը շարունակական ուսումնասիրությունների ծրագրով նախատեսված հայտեր կլինեն: Այսինքն՝ կվերաբերեն նախկինում կատարված աշխատանքներինˋ հայոց մայրաքաղաքների, տարբեր ժամանակներով թվագրվող բազային հուշարձանների ուսումնասիրությունններին կամ համատեղ ծրագրերով տասնյակ տարիներ իրականացվող ծրագրերին:

2014 թվականին եղել են հնագիտական հուշարձանների տարածքում աշխատանքներ կատարելու համար ներկայացված 66 հայտ, որոնց զգալի մասը վերաբերում են փրկարարական և կանխարգելիչ պեղումներին: Հայաստանում մեծ քանակությամբ հուշարձաններ են պեղվում նաև աշխարհի տարբեր երկրների կրթական հաստատությունների հետ համատեղ մշակված ծրագրերով: Տարեկան իրականացվում է առնվազն 12-16 նման ծրագիր: