Զվարթնոցի գազալցակայանը մի քանի տարի խուսափել է փորձաքննությունից

Էջմիածնի մայրուղում' «Զվարթնոց» ռեստորանի մոտակայքում գտնվող գազալցակայանը, որտեղ առավոտյան տեղի է ունեցել պայթյուն, գործել է ապօրինի և չի անցել պետականորեն սահմանված փորձաքննությունը: Այս մասին «Արմենպրես»-ի հետ զրույցում հայտնեց «Տեխնիկական անվտանգության ազգային կենտրոնի» տնօրենի տեղակալ Վոլոդյա Հովսեփյանը: «Շահագործողները գազալցակայանի հիմնումից հետո չեն դիմել փորձաքննության համար, այսինքն' գազալցակայանը շահագործվել է անօրինական կերպով: Տեսչությունը գնացել է այնտեղ, արձանագրություն է կազմել և արգելել շահագործումը, բայց նրանք շարունակել են շահագործել գազալցակայանը»,- ասաց Հովսեփյանը:

«Տեխնիկական անվտանգության ազգային կենտրոնի» տնօրենի տեղակալի խոսքով՝ այսօր տեղի ունեցած պատահարից հետո իրենց սկսել են դժբախտ դեպքի տեխնիկական քննություն, և մի քանի օրից պարզ կլինեն պայթյունի պատճառները:

Վոլոդյա Հովսեփյանը նաև հայտնեց, որ սահմանված օրենքով ոչ միայն գազալցակայանները, այլև բենզալցակայանները, հանքավայրերը, կռունկներն ու վերելակները շահագործողները պարտավոր են տարեկան առնվազն մեկ անգամ դիմել, որ իրենց մոտ կատարվի համապատասխան փորձաքննություն:

Մայիսի 26-ին, ժամը 09.52-ին ահազանգ է ստացվել, որ Էջմիածնի մայրուղում' «Զվարթնոց» ռեստորանի մոտակայքում գտնվող գազալցակայանում լիցքավորման սարքից տեղի է ունեցել պայթյուն. անհրաժեշտ է փրկարարների օգնությունը: Դեպքի վայր են մեկնել երկու մարտական հաշվարկ, ՄՃԿԿ օպերատիվ խումբը և ջրատար: Երեք տուժածներ տեղափոխվել են ՀՀ ԱՆ Ճառագայթային բժշկության և այրվածքների գիտական կենտրոն: Նրանք Ազգային ժողովի նախկին պատգամավոր Հակոբ Հակոբյանի հարազատներն են: Հակոբ Հակոբյանի որդին' Արմեն Հակոբյանը, և եղբորորդին' Արմեն Ռաֆայելի Հակոբյանը, վերակենդանացման բաժանմունքում են: Նրանց վիճակը ծանր է, ստացել են շատ լուրջ այրվածքներ' մարմնի տարբեր մասերի, այդ թվում' շնչուղիների: Երրորդ տուժածը Արթուր Գասպարյանն է, ով ևս շնչափողի այրվածքներ է ստացել' 15-25 տոկոս: Պայթյունի հետևանքով վնասվել է մոտակայքում կայանած «Ֆոլկսվագեն» մակնիշի 34QF306 պ/հ (վարորդ Ա. Հ. Հ.) ավտոմեքենայի բեռնախցիկը և հետնամասի անվադողերը: Հրդեհը մեկուսացվել է ժամը 10.37-ին, մարվել' 10.52-ին: Այրվել են կոմպրեսորային սենյակը և տանիքը ամբողջությամբ (10 ք.մ):

Որոշ տեղեկությունների համաձայն' գազալցակայանը ևս պատկանում է Հակոբ Հակոբյանին: