Արարատի պատանի փրկարարները հանրապետական փուլում զբաղեցրել են չորրորդ տեղը

ՀՀ արտակարգ իրավիճակների նախարարության կողմից կազմակերպված պատանի հրշեջ-փակարարների հանրապետական ամենամյա առաջնությանում Արարատի մարզի պատանի փրկարարները նվաճել են չորրորդ տեղը:

«Արմենպրես»-ի թղթակցի հետ զրույցում փրկարար ծառայության լեյտենանտ, բնակչության պաշտպանության բաժնի ավագ սպա Գևորգ Թեմուրյանն ասաց, որ այս պահին ընթանում են մարզումներ հուլիսի 9-18-ը Բելառուսի Հանրապետության Գոմել քաղաքում կազմակերպվելիք հրշեջ-փրկարարների 13-րդ միջազգային հավաքում լավագույնս հանդես գալու համար, որին կմասնակցի նաև Արարատի մարզի թիմի անդամ Ռաիսա Խչոյանը:

Թեմուրյանը նշեց, որ հանրապետական փուլին նախապատրաստվելու համար թիմի վեց անդամները գարնանը բավականին լուրջ պատրաստվածություն են անցել: Ֆիզիկական պատրաստվածության ուղղությամբ նրանց հետ պարապմունքներն ինչպես նախորդ տարի, այս անգամ ևս իրականացրել է մարզային փրկարարական վարչության բնակչության պաշտպանության բաժնի գլխավոր մասնագետ Հարություն Կարապետյանը: Սպորտային մասով մարզումներն իրականացվել են Արտաշատի քաղաքային մարզադաշտում, մասնագիտական, փրկարարական և գեղարվեստական մասով՝ հրշեջ-փրկարարական ջոկատում, գիտելիքների հարստացմա ն հետ կապված դասընթացները՝ Արտաշատի թիվ 1 դպրոցում, որին մեծապես աջակցել է ուսուցչական անձնակազմը:

Թեմուրյանը նշեց, որ առաջիկա ամիսներին կձևավորվի հաջորդ տարվա մարզային հավաքական թիմը, որի մեջ ընդգրկվող պատանիներին կընտրի մարզային վարչությունում ձևավորված հանձնաժողովը: Սպորտային պատրաստվածության անհրաժեշտությունից զատ, իրականացվում է նաև գիտելիքների ստուգում: Պատանին, որը կընտրվի թիմում, պետք է վարժ տիրապետի ռուսերենին, հայոց պատմությանը, աշխարհագրությանը: «Նա պետք է լինի կիրթ և գրագետ, քանի որ նրանցից ոմանք հետագայում կներկայացնեն մեր հանրապետությունն այլ երկրում, և պարտավոր են լինել ներկայանալի, գիտելիքների պաշարով հարուստ և բազմակողմանի զարգացած»,-ընդգծեց նա:

Առաջնությունը կազմակերպվում է արդեն երրորդ տարին: Նախորդ տարի անցկացված հանրապետական առաջնությունում Արարատի մարզային թիմը զբաղեցրել էր երրորդ, իսկ 2013 թվականին՝ երկրորդ տեղը: «Արդեն երկրորդ անգամ է, որ մեր մարզային հավաքականից ընտրվում են պատանիներ, ովքեր պետք է հանդես գան նաև միջազգային հավաքում: 2013-ին Բելառուսում անցկացված մրցաշարին Հայաստանը ներկայացնող անձնակազմում ընդգրկված էին Արարատի մարզային թիմի չորս անդամ: Մենք հպարտ ենք, որ այս տարի ևս մեր մասնակիցը կմեկնի»,-ընդգծեց Թեմուրյանը: