Գյումրիի քաղաքապետի փեսայի սպանությունը քաղաքական հենք չունի. Վլադիմիր Գասպարյան

«Ի սկզբանե կարող եմ ասել, որ այդ սպանությունը քաղաքական հենք չունի»,-անդրադառնալով Գյումրիի քաղաքապետ Վարդան Ղուկասյանի փեսայի սպանության գործին՝ այսօր լրագրողներին ասաց ՀՀ ոստիկանապետ Վլադիմիր Գասպարյանը, և հավելեց, սպանության բացահայտումը կկատարվի շուտափույթ կերպով:

«Հաշվի առնելով, որ արդեն քննություն է կատարվում, պետք չէ շրջանառել ոչ մի կասկածյալի անուն»,- ասաց ոստիկանապետը:

Ըստ Գասպարյանի՝ չբացահայտվող հանցագործություններ չկան, և Գյումրիում տեղի ունեցած սպանությունն էլ բացառություն չէ։ Գասպարյանը նշեց նաև, որ երկու օրը մեկ իրեն զեկուցում են բոլոր չբացահայտված և աղմակահարույց դեպքերի մասին, որոնք գտնվում են իր անձնական վերահսկողության տակ:

«Ինձ համար սպանությունը մնում է սպանություն. կապ չունի՝ այն կատարվել է պաշտոնյայի, թե հասարակ քաղաքացու նկատմամբ»,-նշել է ոստիկանապետը:

Հիշեցնենք, որ երեկ ոստիկանությունը Mercedes-Benz մակնիշի 16 OL 850 պետհամարանիշներով ավտոմեքենայի մեջ հայտնաբերել էր 27-ամյա Կարեն Եսայանի դին: Կարեն Եսայանը Գյումրիի քաղաքապետի դստեր նշանածն էր: