Գյումրիում ՀԿԳ ավագ քննիչին վրաերթի ենթարկողը տեղափոխվեց բանտ

Այսօր՝ ապրիլի 15-ի կեսօրին, Շիրակի մարզի ընդհանուր իրավասության դատարանում դռնփակ դատական նիստ էր: Ինչպես հայտնել է ֆոտոլրագրող Գագիկ Շամշյանը, նշված դատարան էր բերվել Գյումրիի բնակիչ, 23-ամյա Ռաֆիկ Մուրադյանը: Քննչական մարմինը դիմել է նշված դատարանին, որպեսզի Ռ. Մուրադյանի նկատմամբ որպես խափանման միջոց ընտրվի երկամսյա կալանքը: Դատավոր Լիլիթ Խաչատրյանը դատական դռնփակ նիստ անցկացնելուց և խորհրդակցական սենյակից վերադառնալուց հետո բավարարեց քննչական մարմնի միջնորդությունը:

Ինչպես ավելի վաղ դեպքի վայրից հայտնել էր ֆոտոլրագրող Գագիկ Շամշյանը, ապրիլի 13-ին ժամը 00.50-ի սահմաններում Գյումրի քաղաքի Գարեգին Նժդեհի թիվ 7 շենքի մոտ (ոստիկանության Գյումրիի վարչական շենքի դիմաց) Ռաֆիկ Մուրադյանը վրաերթի էր ենթարկել ոստիկանության Շիրակի մարզային քննչական բաժնի ՀԿԳ ավագ քննիչ, ոստիկանության փոխգնդապետ, 58-ամյա Վահրամ Բեյբությանին, որը ստացած մարմնական վնասվածքներից տեղում մահացել էր:

Ռաֆիկ Մուրադյանը վրաերթից հետո դիմել էր փախուստի: Նրան կարողացել էին հետապնդել և իր կողմից վարած «ՎԱԶ-21013» մակնիշի 45 ՍՕ 132 համարանիշի ավտոմեքենայով հանդերձ բռնել ճանապարհային ոստիկանության 2-րդ սպայական գումարտակի 2-րդ վաշտի 2-րդ դասակի և ոստիկանության Գյումրիի բաժնի աշխատակիցները: Փաստի առթիվ հարուցվել էր քրեական գործ ՀՀ քրեական օրենսգրքի 242 հոդվածի 2-րդ մասի և 244 հոդվածի հատկանիշներով:

Ի դեպ, Գ.Շամշյանը հայտնում է նաև, որ Վ.Բեյբությանը այսօր Գյումրիում տեղի ունեցած աղմկահարույց սպանության գործով քննչական խմբի անդամներից էր:

Իսկ վրաերթի փաստով հարուցված քրեական գործով քննությունը ոստիկանության քննչական գլխավոր վարչության Շիրակի մարզի քննչական բաժնից տեղափոխվել է Հայաստանի Հատուկ քննչական ծառայություն:

Լուսանկարը՝ Գագիկ Շամշյանի

Tert.am