Նիկոլ Փաշինյանի կողմնակիցների դեմ իրականացված բռնությունների պատասխանատուն իշխանությունն է. Գոհար Վեզիրյան

Թիվ 12 ընտրատարածքում առաջադրված պատգամավորության թեկնածու Գոհար Վեզիրյանը Նիկոլ Փաշինյանի կողմնակիցների նկատմամբ այսօր իրականացված բռնությունները դատապարտող հայտարարություն է տարածել, որը ներկայացնում ենք ստորև։

«Տեղեկացա, որ Մալաթիա-Սեբաստիա վարչական շրջանում խոչընդոտվել է թիվ 7 ընտրատարածքում առաջադրված «Հայկական ժամանակ» օրաթերթի գլխավոր խմբագիր Նիկոլ Փաշինյանի քարոզարշավը։ Ըստ լրատվամիջոցների հրապարակումների, Նիկոլ Փաշինյանի կողմնակիցների վրա են հարձակվել նույն ընտրատարածքում առաջադրված Սամվել Ալեքսանյանի կողմնակիցները, քաշքշել են և պահանջել դադարեցնել քարոզարշավը։ Փաշինյանն անձամբ գնացել է դեպքի վայր, որտեղ նրան դիմավորել են «բերված» քաղաքացիներ, հիմնականում՝ կանայք՝ պահանջելով Փաշինյանից հեռանալ տարածքից։ Ավելի ուշ բռնության են ենթարկվել նաեւ ՀԱԿ ներկայացուցիչ Զոյա Թադեւոսյանն ու ԱԺ պատգամավորության թեկնածուներ, իմ գործընկեր Գայանե Առուստամյանը և Բաբկեն Գարոյանը։ Վերջինս քթի կոտրվածքով տեղափոխվել է հիվանդանոց։

Նիկոլ Փաշինյանի եւ նրա կողմնակիցների դեմ իրականացված բռնությունների պատասխանատուն իշխանությունն է, քանի որ Սամվել Ալեքսանյանը չէր կարող ինքնագլուխ որոշումներ կայացնել եւ հարձակում ծրագրել ՀԱԿ ներկայացուցիչների վրա։ Տեղի ունեցածը հակասում է իշխանությունների՝ ազատ, արդար եւ թափանցիկ ընտրություններ անցկացնելու մասին տրված խոստումներին։ Սերժ Սարգսյանն իր հանդիպումներում քարոզում է քաղաքական հանդուրժողականություն, մինչդեռ կոնկրետ իրավիճակներում դառնում է խուլիգանների եւ հանցագործների հովանովորյալը՝ այսպիսով բացառելով ժողովրդավարական ընտրություններ անցկացնելու բոլոր հնարավորությունները։ Սերժ Սարգսյանին ցանկանում եմ հիշեցնել, որ նա ի պաշտոնե պարտավոր է ապահովել նախընտրական քարոզարշավի օրինական ընթացքը։

Իշխանությունը մենք ենք՝ ՀՀ քաղաքացիներս, եւ մենք մեր կամքը պիտի պարտադրենք՝ պահանջելով պատժել միջադեպի հեղինակներին, սադրիչներին եւ այն մարդկանց, որոնք, օգտագործելով քաղաքացիների սոցիալ–տնտեսական ծանր վիճակը, ՀՀ քաղաքացուն դարձնում են իրենց էժանագին ծրագրերի գործիք ու իրենց կեղտոտ ձեռքերի խաղալիքը։

Խստորեն դատապարտելով իշխանությունների որդեգրած գործելաոճը՝ պահանջում եմ անհապաղ պատասխանատվության ենթարկել սադրիչներին և պատգամավորության թեկնածուների նկատմամբ բռնություն կիրառած անձանց և ապահովել նախընտրական քարոզչության օրինական ընթացքը»,- ասված է հայտարարությունում։