Կրեմլն ուսումնասիրում է Թուրքիայի սահմանը խախտած ռուսական ինքնաթիռի դեպքը

Պաշտոնական Կրեմլն արձագանքել է Թուրքիայի արտաքին գործերի նախարարության հայտարարությանը՝ կապված ռուսական ռազմական ինքնաթիռի կողմից թուրքական օդային սահմանը խախտելու հետ:

Ինչպես հաղորդում է «Արմենպրես»-ը՝ վկայակոչելով ռուսական ՌԻԱ գործակալությունը, Ռուսաստանի Դաշնության նախագահի մամուլի խոսնակ Դմիտրի Պեսկովը լրագրողների հետ զրույցում հաստատել է, որ Անկարայում ՌԴ դեսպանը կանչվել է Թուրքիայի ԱԳՆ:

«Նրան նոտա է հանձնվել, որտեղ հիշատակվում են հստակ փաստեր, որոնք մենք կուսումնասիրենք»,- ասել է Պեսկովը:

Թուրքիայի արտաքին գործերի նախարարությունը հոկտեմբերի 5-ին Ռուսաստանին ուղղված կոշտ հայտարարություն է տարածել՝ կապված հոկտեմբերի 3-ին Սիրիայում ռազմական գործողություններ իրականացնող ռուսական ինքնաթիռի՝ թուրքական օդային տարածքը խախտելու հետ: Թուրքիայի ԱԳՆ հայտարարության մեջ նշվում է, որ ռուսական ինքնաթիռը խախտել է սահմանը Հաթայի շրջանում և միայն թուրքական F-16 ռազմական ինքնաթիռների միջամտությամբ անցել է Սիրիա: «Այս կապակցությամբ Անկարայում Ռուսաստանի դեսպանը կանչվել է նախարարություն, որտեղ նրան հայտնել ենք մեր կտրուկ բողոքը և պահանջել այսուհետև նման դեպք թույլ չտալ, հակառակ դեպքում հնարավոր ոչ ցանկալի հետևանքների պատասխանատվությունը կկրի Ռուսաստանի Դաշնությունը»,- ասվում է Թուրքիայի ԱԳՆ հայտարարության մեջ: