Գիտնականները խոստանում են՝ խոզերին օրգանների իդեալական դոնորներ դարձնել մարդու համար

Ամերիկացի գիտնականները խոստացել են խոզերի օրգանները պիտանի դարձնել մարդուն փոխպատվաստելու համար: Գենային ինժեներիայի CRISPR/Cas9 նոր մեթոդի օգնությամբ նրանք բազմաթիվ գեներ են ձևափոխել խոզերի սաղմերում, ինչը դյուրացրել է նրանց օրգանների փոխպատվաստումը մարդու օրգանիզմում: Ինչպես տեղեկացնում է «Արմենպրես»-ը, հայտնագործության մասին հայտնել է Popular Science-ը՝ հղում անելով ԱՄՆ-ի Գիտությունների ազգային ակադեմիայի սեմինարում ծագումնաբան Ջորջ Չերչի զեկույցին:

Չերչի հայտնագործությունը նաև նոր հնարավորություններ է ընձեռում մարդու սաղմերի գենետիկական ձևափոխման համար (ժառանգական հիվանդությունների դեմ պայքարելու նպատակով), որի բարոյական ու բժշկական անվտանգության շուրջ գիտնականներն ակտիվորեն վիճում էին 2015 թվականին: