Ջեյմս Ուորլիքն ու Ջոն Հեֆերնը Վաշինգտոնում մասնակցել են դեսպան Տիգրան Սարգսյանի հրավիրած ընդունելությանը

ԱՄՆ-ում ՀՀ դեսպանությունում տեղի է ունեցել ընդունելություն Հայաստանի Հանրապետության անկախության տոնի կապակցությամբ: Ընդունելությանը ներկա են եղել ԱՄՆ պետքարտուղարի գլխավոր փոխտեղակալ դեսպան Ջոն Հեֆերնը, ԵԱՀԿ Մինսկի խմբի ԱՄՆ համանախագահ դեսպան Ջեյմս Ուորլիքը, ԱՄՆ պետքարտուղարության և պաշտպանության քարտուղարության պաշտոնյաներ, ԱՄՆ-ում հավատարմագրված դիվանագետներ և ռազմական կցորդներ, ինչպես նաև ԱՄՆ արևելյան ափի հայ համայնքի և համայնքային հիմնական կառույցների, ներառյալ՝ Հայաստանյայց Առաքելական Եկեղեցու, Հայ դատի գրասենյակի և Ամերիկայի Հայկական համագումարի բազմաթիվ ներկայացուցիչներ:

Համառոտ կերպով անդրադառնալով անկախության 24 տարիների ընթացքում ձեռք բերած նվաճումներին՝ ԱՄՆ-ում ՀՀ դեսպան Տիգրան Սարգսյանը շնորհակալություն է հայտնել ԱՄՆ-ի կողմից Հայաստանին ցուցաբերած մշտական օժանդակության համար: Նա հյուրերի ուշադրությունը հրավիրել է այսօր Հայաստանի առջև ծառացած մարտահրավերների վրա՝ շեշտելով միաժամանակ դրանք հաղթահարելու հայ ժողովրդի և Հայաստանի իշխանությունների մեծ վճռականությունը: Ընդգծելով Հայաստանի անվտանգության ապահովման և տնտեսական զարգացման առումով ՌԴ-ի հետ ունեցած ռազմավարական համագործակցության, ինչպես նաև ՀԱՊԿ-ում և ԵԱՏՄ-ում մասնակցության կենսական նշանակությունը՝ դեսպանը նաև ընդգծել է եվրոպական երկրների, Եվրոպական միության և ԱՄՆ հետ ամենատարբեր բնագավառներում վերընթաց զարգացում ապրող համագործակցության փաստը: Հայ-ամերիկյան հարաբերությունների վերընթաց զարգացման մասին են վկայում ամերիկյան «Կոնտուր Գլոբալ» ընկերության նշանակալից ներդրումները և կողմերի միջև վերջերս ստորագրված՝ «Առևտրի և ներդրումների շրջանակային պայմանագիրը»: Վերջինս լայն հեռանկար է ստեղծում առևտրատնտեսական համագործակցության խթանման համար:

Ելույթով հանդես է եկել նաև Ջոն Հեֆերնը, որը գոհունակությամբ նշել է երկկողմ հարաբերություններում առկա դրական դինամիկան և այն պահպանելու շուրջ ԱՄՆ հանձնառությունը: Միջոցառման ընթացքում դեսպան Սարգսյանը ՀՀ Նախագահի հրամանագրով շնորհված պարգևներ է հանձնել ամերիկահայ համայնքի ներկայացուցիչներին՝ բարերար Ժիրայր Նշանյանին (Երախտագիտության մեդալ) և ԱՄՆ Կոնգրեսի գրադարանի գիտաշխատող, հայագետ Լևոն Ավդոյանին (Մովսես Խորենացու մեդալ):