Ամեն ինչ անելու ենք երկրպագուների հավատը վերականգնելու համար. Հենրիխ Մխիթարյան

Ֆուտբոլի Հայաստանի ազգային թիմի և Դորտմունդի «Բորուսիա»-ի կսապաշտպան Հենրիխ Մխիթարյանը Sport-express պարբերականին տված հարցազրույցում խոսել է ազգային հավաքականի անհաջող ելույթների, «Բորուսիա»-ում իր կարևորության և ադրբեջանական «Գաբալա»-ի հետ հանդիպմանն իր հնարավոր մասնակցության մասին:

«Խաղադաշտում ես տալիս եմ ամբողջ ուժերս, օգնում եմ թիմակիցներիս գոլը խփել, նրանք էլ փոխադարձ. ի վերջո, միմյանց օգնելով, օգնում ենք թիմին հաղթանակի հասնել: Հիմա «Բորուսիա»-ում ինձ մոտ կարծես թե ամեն ինչ ստացվում է: Թիմակիցներս օգնում են ինձ ցույց տալու իմ լավագույն խաղը: Կարևոր է նաև այն, որ մրցաշրջանի հենց սկզբից գոլեր եմ խփում»,- ասել է Մխիթարյանը:

Մխիթարյանի կարծիքով' Հայաստանի ֆուտբոլի ազգային թիմն ունի մի երազանք' մասնակցել Եվրոպայի և աշխարհի առաջնությանը: «Չեմ կարող ասել` հիմա շատ  հիասթափված եմ, քանի որ այս շրջափուլում  ընդամենը երկու միավոր վաստակեցինք: Իսկ երկու կամ չորս տարի առաջ, երբ մենք լավ հնարավորություններ ունեինք խոշոր մրցաշարի եզրափակիչ փուլ դուրս գալու, այդ ժամանակ իսկապես ցավալի էր: Երևանում քիչ հանդիսական էր եկել մարզադաշտ Ալբանիայի հետ խաղին' հասկանալի պատճառներով: Երկրպագուները հիասթափված են, քանի որ պարտվել ենք գրեթե բոլոր խաղերում: Ամեն ինչ անելու ենք նրանց հավատը վերականգնելու համար: Աստված տա աշխարհի 2018թ-ի առաջնությանը լավ պատրաստվենք: Որակավորման փուլին դեռ մեկ տարի կա: Կարծում եմ հաջողության համար նաև մի փոքր բախտ է պետք: Շատ ուրախ կլինեմ եթե հավաքականի հետ հաջողության հասնեմ:»,-շեշտել է Մխիթարյանը:

Ֆուտբոլի Հայաստանի ազգային թիմը Եվրոպայի առաջնության ընտրական փուլում հավաքեց 2 միավոր և մրցաշարային աղյուսակում զբաղեցրեց վերջին հորիզոնականը:

Այն հարցին, թե արդյո՞ք «Գաբալայի» դեմ խաղին մասնակցելու համար Ադրբեջան մեկնելու վիզա ֆուտբոլիստը ստացել է Մխիթարյանը նշել է.

«Չգիտեմ: Անձնագիրս ինձ մոտ չէ :Ավելի լավ է հարցնեք ակումբի ղեկավարությանը: Ես պարաստվում եմ խաղին»:

Հիշեցնենք, որ ավելի վաղ դորտմունդյան թիմի գործադիր տնօրեն Հանս Յոահիմ Վատցկեն նշել էր, որ Մխիթարյանը հավանաբար չի մասնակցի Բաքվում կայանալիք խաղին: