ԱՄՆ-ն մտադիր է նոր պատժամիջոցներ կիրառել Ռուսաստանի դեմ

ԱՄՆ-ն նախկինի պես քննարկում է Ռուսաստանի դեմ տնտեսական պատժամիջոցներ սահմանելու հարցը՝ Միջին կամ փոքր հեռահարության հրթիռների ոչնչացման մասին պայմանագրի խախտման համար, սակայն դեռ որոշում չի կայացրել։ Այդ մասին հայտնել է սպառազինությունների և միջազգային անվտանգության հարցերով ԱՄՆ-ի պետքարտուղարի տեղակալ Ռոուզ Գեթեմյուլերը, գրում է «ՌԻԱ Նովոստին»:

«Մենք շարունակում ենք քննարկել տնտեսական պատժամիջոցներ սահմանելու հարցը՝ պայմանավորված պայմանագրի խախտմամբ, սակայն այս պահին դեռ որոշում չենք կայացրել»,- հայտարարել է նա Ներկայացուցիչների պալատում լսումների ընթացքում:

Պաշտոնյան հիշեցրել է, որ ԱՄՆ-ն ավելի վաղ ԵՄ-ի հետ միասին տնտեսական պատժամիջոցներ սահմանել է Ուկրաինայում իրավիճակի պատճառով, որը, նրա խոսքով, «չափազանց արդյունավետ» է:

Ավելի վաղ պաշտոնյաները բազմիցս հայտարարել են նոր տնտեսական ու ռազմական միջոցառումների հավանականության մասին՝ պայմանավորված վերոնշյալ պայմանագրի խախտումով: Սակայն որևէ հստակ որոշում չի կայացվել, ինչը հարուցել էր Կոնգրեսի բազմաթիվ անդամների՝ հատկապես հանրապետականների զայրույթը, որոնք քննադատում են դեմոկրատ նախագահ Բարաք Օբամայի վարչակազմի գործողությունները։