ԱՄՆ-ն կթույլատրի Իրանին՝ ուրանը հարստացնել մինչև հինգ տոկոս. Los Angeles Times

ԱՄՆ իշխանությունները մտադիր են Իրանին առաջարկել միջուկային ծրագրի իրականացման կոմպրոմիսային տարբերակ, գրում է Los Angeles Times–ը։

Օբամայի վարչակազմը հայտարարել է, որ Իրանը կարող է ուրան հարստացնել մինչև 5%–ի սահմաններում, եթե այդ երկրի ղեկավարությունը համաձայնի թույլ տալ իր միջուկային օբյեկտներում միջազգային տեսուչները մշտական և անարգել վերահսկողություն իրականացնել։

Հրապարակման մեջ նշվում է, որ ԱՄՆ-ը դիտարկում է նման փոխզիջման հնարավորությունը, քանի որ մտավախություն կա Իրանի միջուկային ծրագրի շուրջ ապրիլի 14-ին Ստամբուլում վերականգնված բանակցությունների տապալման առումով։ Ամերիկացի դիվանագետների կարծիքով, Թեհրանը երբեք չի համաձայնի ամբողջովին հրաժարվել ուրանի հարստացումից և այդ հարցում կոմպրոմիսային տարբերակի բացակայությունը կարող է ռազմական հակամարտության հանգեցնել։ 

Սակայն, ինչպես նշում է հեղինակավոր պարբերականը, ԱՄՆ նախագահի վարչակազմի կողմից նման առաջարկը հնարավոր է լուրջ առարկության հանդիպի ԱՄՆ Կոնգրեսում և Իսրայելի ղեկավարության կողմից։

Ներկայումս իրանցի գիտնականները մինչև 20% ուրանի հարստացման հնարավորություն են ձեռք բերել, մինչդեռ ատոմային ռումբ ստեղծելու համար պահանջվում է ուրանի մինչև 90% հարստացում։

Թեհրանը պնդում է, որ իր միջուկային ծրագիրը բացառապես խաղաղ բնույթ է կրում և հարստացնում է երկրում էլեկտրաէներգիայի ապահովման համար։ Միևնույն ժամանակ, Իրանը միջուկային ծրագրի խնդրով այդ երկրի նկատմամբ մի շարք միջազգային պատժամիջոցներ են կիրառվում։ Փետրվարին ԱՄՆ պաշտպանության նախարար Լեոն Պանետան հայտարարել էր մինչև այս տարվա առաջին կիսամյակ Իրանի միջուկային օբյեկտների վրա հարձակում գործելու հնարավորության մասին։

2003–ից սկսած՝ ՄԱԳԱՏԷ-ն ԱՄՆ-ի, Ռուսաստանի, Բրիտանիայի, Գերմանիայի, Ֆրանսիայի և Չինաստանի հետ համատեղ ձգտում է կասեցնել Իրանի ուրանի հարստացման գործունեությունը։