Ո՞վ վճարի, ո՞վ ուտի

Ցավոք, մարդկային ագահությունը չափ ու սահմաններ չի ճանաչում: Նրանք, ովքեր ավտոմեքենա են վարում, շատ լավ ծանոթ կլինեն Հայաստանի ԱՊՊԱ ոլորտին, դրա խնդիրներին ու ունեցած դրական կողմերին: Չնայած վստահ ենք՝ շատերը հիմա կտարակուսեն՝ կապված վերջին հանգամանքի հետ: Ներկայումս փաստացի ԱՊՊԱ համակարգը շատ քաղաքացիների գլխին վերածվել է իսկական պատուհասի, որը սակայն, ինչպես պարզվում է վիճակագրությունից, բավական եկամտաբեր բիզնեսի է վերածվել նրանց համար, ովքեր զբաղվում են նմանատիպ ծառայություն մատուցելով ազգաբնակչությանը: Այսպես. համաձայն ավտոապահովագրողների բյուրոյի հրապարակած վերջին հաշվետվության՝ 2015թ. նոյեմբերի 30-ի դրությամբ ԱՊՊԱ պայմանագիր ունեցող ավտոտրանսպորտային միջոցների քանակը Հանրապետությունում կազմել է 445,649 միավոր, ինչը, նախորդ ամսվա համեմատ, աճել է 2,711-ով: Այս ընթացքում վարորդներն ԱՊՊԱ-ի համար վճարել են 15 մլրդ 389 մլն 384 հազար դրամ: Հունվար-նոյեմբերին բավարարված դիմումների գծով վճարված(վճարվելիք) հատուցումների ընդհանուր գումարը կազմել է մոտ 7.9 մլրդ դրամ: Ամսվա ընթացքում կարգավորված դիմումների քանակը կազմել է 3,674, ինչը, նախորդ ամսվա համեմատ, նվազել է 130-ով։ Հատուցման միջին չափը 2015թ. նոյեմբեր ամսվա դրությամբ կազմել է 212,107 դրամ: 2015 թվականի նոյեմբեր ամսվա դրությամբ փաստացի վնասաբերության ցուցանիշը կազմում է մոտ 52%։ Այս ամենից պարզվում է, որ ԱՊՊԱ պայմանագրերի համար վարորդների վճարած գումարների միայն մոտ կեսն է վերադարձվում վարորդներին՝ հատուցման տեսքով, իսկ գրեթե նույնչափ գումար գնում է ապահովագրող ընկերությունների գրպանը:

Այսքանից հետո կանգնել և ինքնավստահ ձայնով հայտարարել, թե ԱՊՊԱ-ն իրեն արդարացրել է, կեղծավորության գագաթնակետը կլիներ: Չնայած լավ էլ արդարացրել է իրեն, միայն թե այս անգամ ոչ ի շահ հանրության… Թե ինչքան կշարունակվի ոլորտի նման բարձիթողի իրավիճակը, դեռ պարզ չէ, բայց որ անհրաժեշտ է հստակ մեխանիզմներ մշակել այս համակարգի արդյունավետությունը էապես բարձրացնելու ուղղությամբ, աներկբա է:

Դավիթ Բաբանով