Ալիևը չի համարձակվի գնալ լայնամասշտաբ պատերազմի. Արա Պապյան

Ադրբեջանի նախագահ Իլհամ Ալիևը չի համարձակվի գնալ լայնամասշտաբ պատերազմի Ղարաբաղում, քանի որ առկա ռիսկերը մեծ են:

«Արմենպրես»-ի փոխանցմամբ, «Մոդուս Վիվենդի» վերլուծական կենտրոնի ղեկավար Արա Պապյանի գնահատմամբ մեծ է վտանգը, որ պատերազմը կընթանա նրա համար անցանկալի հունով:

«Ցավոք, լարվածությունը ղարաբաղյան հակամարտության գոտում կշարունակվի, կլինեն զոհեր, բայց լայնամասշտաբ պատերազմ ես չեմ կանխատեսում»,- ասաց Պապյանը՝ հավելելով, որ Ալիևի վարքի մեջ որևէ փոփոխություն չի լինի՝ ռազմական հռետորաբանությունը կշարունակվի, դիվերսիոն հարձակումներն ու լարվածությունը՝ նույնպես: Պապյանի գնահատմամբ՝ Հայաստանը չի կարող խուսափել Ադրբեջանի կողմից ստեղծված լարվածությունից, սակայն կարող է բարելավել իրավիճակն առաջնագծում, սահմանին թարմացնել տեխնիկան: «Բյուջեում պետք է փոփոխություններ կատարվեն: ՊՆ-ն էլ պետք է վերանայի ծախսերն ու ոչ առաջնային բոլոր ծախսերն ուղղի դեպի առաջնագծի տեխնիկական հագեցվածությունը վերազինելուն»,- ասաց Պապյանը:

Հարցին, թե կարո՞ղ է նավթի գների անկումն ազդել Ադրբեջանի նկատմամբ գերտերությունների դիրքորոշումների վրա, Պապյանը պատասխանեց, որ Ադրբեջանի նկատմամբ վերաբերմունքն արդեն փոխվել է, քանի որ նավթային դարաշրջանն արդեն ավարտվել է, տեխնոլոգիական հեղափոխություն է տեղի ունեցել: Հետևաբար, Ադրբեջանի համար անհնար է լավ ապագա կանխատեսել: