Դատում են

Հավանաբար, շատերդ եք, եթե ոչ խմել, ապա գոնե լսել ՀՀ ԱԺ պատգամավոր, հայտնի գործարար Սամվել Ալեքսանյանին պատկանող ընկերությունների կողմից արտադրվող «առասպելական» օղիների մասին: Անկախ այն բանից, թե ձեզանից ամեն մեկդ ինչ կարծիք ունի սույն գործարարի վերաբերյալ, համաձայնե՛ք, որ նրան միայն նախանձել կարելի է, թե ինչպես է այս ճարպիկը մշտապես կարողանում հմտորեն շրջանցել իր առաջ ծառացած բոլոր արգելքները, պատնեշներն ու հասնել այն նպատակակետին, որ ինքն իր առջև ի սկզբանե դրել էր: Իհարկե, ասել, թե Ալեքսանյանը միակն է այս երկրում, որին հաջողվում է շրջանցելով օրենքը՝ հասնել բիզնես հաջողություների, սխալ կլիներ. համաձայնե՛ք, որ Հայաստանն իր նորանկախ պատմության որևիցե փուլում չի փայլել օրինասեր գործարարների առատությամբ, որոնց համար օրենքի տառը կհանդիսանար այն ռուբիկոնը, որից անդին անցնելն ուղղակի անհնար կլիներ: Համաձայնե՛ք նաև, որ Ալեքսանյանի անունը միշտ էլ եղել է այն մարդկանց անունների շարքում, որոնց շուրջ մշտապես սկանդալներ են հասունացել ու մինչև հիմա էլ շարունակում են հասունանալ, հարուցվում են տարբեր դատական գործեր՝ կապված նրա գործունեության հետ և այլն, բաներ, որոնք չեն կարող դրականորեն ընկալվել ժողովրդի լայն զանգվածների կողմից:

Պարզվում է՝ Մալաթիա-Սեբաստիա վարչական շրջանի առաջին ատյանի դատարանում օրերս շարունակվել է Սամվել Ալեքսանյանի ընտանիքին պատկանող «Ա և Գ» և «Ալեքս Գրիգ» ընկերությունների դեմ դատական հայցի լսումը: Հիշեցնենք, որ Կիպրոսում գրանցված «Վլակտոր Թրեյդինգ Լիմիթեդ» ընկերությունը, որը բոլորիս հայտնի «Զելյոնայա մարկա» օղու ապրանքանիշի սեփականատերն է, հայց է ներկայացրել պատգամավորի ընտանիքին պատկանող ընկերությունների դեմ՝ բողոքելով օղու նմանակման, ավելի ճիշտ՝ կեղծման դեմ: Նշենք նաև, որ փետրվարի 16-ին նույն դատարանում կայանալու է ՌԴ Մոսկվայի մարզում գրանցված «Պառլամենտ Դիստրիբյուշն» ընկերության հայցի լսումն ընդդեմ նույն ընկերությունների՝ ապրանքային նշանն օգտագործելու արգելքի պահանջով:

Հետաքրքրականն այն է, սակայն, որ պատգամավորի ընտանիքին պատկանող ընկերությունների դեմ օղու կեղծման ու նմանակման մեղադրանքով դատական նիստերն սկսվել են դեռ 6 տարի առաջ՝ 2010 թվականից, ու, կարելի է ասել, որ ոչ մի արդյունք չեն ունեցել՝ բացի, թերևս, կիրառված որոշակի տուգանքներից, որոնց չափն այնքան չնչին է, որ չի կարող ազդել Ալեքսանյանի ունեցած ֆինանսական կարողությունների վրա: Չնայած այս ամենին՝ պատգամավորին պատկանող ընկերությունները շարունակել են նույն գործելաոճը՝ առանց ուշադրություն դարձնելու, թե ով ինչ տուգանքներ է սահմանում կամ ինչ դատավճիռներ է ընթերցում:

Դե հիմա ես չեմ՝ դուք եք, ասե՛ք, թե ինչպե՞ս է ստացվում, որ մեկը, ով չունի համապատասխան կապեր այս երկրում, կարող է մի չնչին զանցանքի պատճառով զրկվել ողջ ունեցվածքից, իսկ նրանք, ովքեր տարբեր թելերով ու ճանապարհներով կապված են «վերևների» հետ, իրենց ազատորեն կարող են թույլ տալ ու մարսել այնպիսի բաներ, որոնք մարդու երևակայության մեջ ոչ մի կերպ չեն կարող տեղավորվել: Ստացվում է, որ նույնիսկ պետությունը՝ իր ամբողջ վարչական ռեսուրսներով հանդերձ, փաստացի, ի զորու չէ կանխել այն կեղծարարությունները, որոնց մասին գիտի գրեթե յուրաքանչյուր քաղաքացի. խոսքը, առաջին հերթին, օղիների բացահայտ կեղծման մասին է: Լա՛վ, եթե, այնուամենայնիվ, որոշել եք կեղծել, արե՛ք դա գոնե որակով, արե՛ք մի փոքր ավելի բարեխղճորեն, հակառակ պարագայում՝ պատասխանատվություն եք կրելու այն թունավորումների համար, որոնք տեղի են ունենում ձեր կեղծ խմիչքների օգտագործման հետևանքով (եթե իհարկե պատասխանատվության կանչող լինի):

Թե դատավարության արդյունքներն ինչպիսին կլինեն, ցույց կտա դրա ավարտը, սակայն կարծել, թե այս երկրում որևէ դատարան ի զորու է՝ երկրում նոր կարգեր հաստատելու ու օրենքի իշխանությունը դարձնելու բացարձակ, միամտութուն կլիներ. համաձայնե՛ք, որ այդ անելու համար շատ ավելի հզոր ատյանների կողմից կայացվելիք որոշումների կարիք է զգացվում, քան այս կամ այն դատավարության ավարտին ընթերցվող դատավճիռներն են…

Դավիթ Բաբանով