Նիկոլ Փաշինյանը «ընգեր ջան»-ով և «դու»-ով խոսող պաշտոնյայից բացատրություն է ակնկալում

ԱԺ պատգամավոր Նիկոլ Փաշինյանը ֆեյսբուքյան իր էջում գրել է.

Հունվարի 23-ին Փարիզից Մոսկվայով Երևան վերադառնալով «Զվարթնոց» օդանավակայանում ճամպրուկս ջարդված վիճակում ստացա: Ի դեպ, վերջին երկու ուղևորություններս ավարտվել են ջարդված ճամպրուկներով: Աշնանը՝ «Տրանս Աէրո» ընկերությունն էր, հիմա էլ՝ «Աերոֆլոտը»:

Այսօր մի ժամ ազատ ժամանակ ունեի, որոշեցի մտնել «Աերոֆլոտի» երևանյան ներկայացուցչություն՝ ճամպրուկիս փոխհատուցման ետևից: Այստեղ նախ ասացին, թե ուշացել եմ, և պետք է 7 օրվա ընթացքում ներկայանայի:

Հարգելի տիկնոջը բացատրեցի, որ ճամպրուկի ջարդվելը իմ համեստ կյանքի ամենակարևոր իրադարձությունը չէ, և չէի կարող իմ պլանավորված կյանքն ու գործունեությունը փոխել այնպես, որ հանկարծ չուշանամ «Աերոֆլոտի» օֆիսի պաշտոնյայի մոտ ընդունելությունից:

Ասաց՝ միևնույն է, յոթ օրն անցել է և իմ դիմումը կմերժեն: Ասացի, ոչինչ, ես կգրեմ: Ինձ տվեց ռուսերեն դիմում գրելու ձև: Ասում եմ՝ ինչու՞ է ռուսերեն: Ասում է՝ կարող եք նաև անգլերեն գրել:

Ասում եմ՝ Հայաստանի Հանրապետությունում պետական լեզու գոյություն ունի ու հիմա մենք կարծես թե Հայաստանի Հանրապետությունում ենք: Կամ՝ ենթադրենք, ես ոչ ռուսերեն գիտեմ, ոչ անգլերեն: Ասում է՝ դիմումը պիտի տանեք թարգմանել տաք:

Բացատրություն եմ ակնկալում մի մարդուց, ով ակնհայտորեն պաշտոնյա է ներկայացուցչությունում: Վերջինս ինձ հետ խոսում է «ընգեր ջան»-ով և «դու»-ով:

Ի վերջո՝ վերցնում եմ դիմումի ռուսերեն ձևաթուղթը, այն լրացնում հայերեն, ու հանձնում:

Ու մտածում. կառավարության որդեգրածը բաց երկնքի՞ քաղաքականություն է, թե՞ բաց ինչի»: