Իրանն Արևմուտքին պահանջում է չավելացնել իր հանդեպ ճնշումները

Թեհրանն արդեն զգուշացրել է արևմտյան երկրներին իր նկատամամբ ճնշումը մեծացնելու անցանկալիության մասին։ Իրանի պաշտոնական դիրքորոշումը ներկայացվել էմիջուկային ծրագրի շուրջ «վեցնյակի» հետ բանակցություների հաջորդ փուլի նախաշեմին, հաղորդում է Росбалт–ը։

Համապատասխան հայտարարությունն արել է միջուկային բանակցությունների իրանական պատվիրակության ղեկավար Սաիդ Ջալիլին, որը նշել է, որ Իրանի իշխանությունների դեմ «անարդյունավետ դիտողությունները» խոչընդոտում են բանակցությունների կառուցողական ընթացքին։

Նախօրեին Ջալիլին Թեհրանում հանդիպել է Ֆրանսիայի նախկին վարչապետ Միշել Ռոկարդին, որի այցը տեղի է ունեցել նախքան մայիսի 23-ին Բաղդադում կայանալիք «վեցնյակի» և Իրանի միջև միջուկային խնդրով բանակցությունների հաջորդ փուլը։

Միևնույն ժամանակ, պաշտոնական Փարիզը հերքել էր լուրերը, որ նախկին վարչապետի այցը Իրան դիվանագիտական առաքելության մի մասն է կազմում։ Համաձայն նորընտիր նախագահ Ֆրանսուա Օլանդի վարչակազմի հայտարարության, քաղաքական գործչի այցն «ամբողջովին մասնավոր բնույթ է կրում»։

Ավելի վաղ Ռոկարդոյի այցի մասին իրանական ԶԼՄ–ները տեղեկություններ էին տարածել, որ այն երկու կողմերի միջև բանակցությունների նոր ուղի փնտրելու նպատակ է հետապնդում։

Հատկանշական է, որ Միշելը Ռոկարդը, որը Ֆրանսիայի վարչապետ է եղել 1988–1991 թթ, համարվում է Եվրոպայի ականավոր քաղաքական գործիչ, որի գործունեությունն ուղղված է խթանել միջուկային զինաթափման գործընթացը։ Ռոկարդն աշխատել է միջուկային զենքի վերացման Կանբերյան հանձնաժողովում և այդ ուղղությամբ մի քանի գիտական աշխատանքների հեղինակ է։

Այս շաբաթ Վիեննայում Ատոմային էներգիայի միջազգային գործակալությունը երկօրյա հանդիպում կանցկացնի Իրանի պատվիրակության հետ, որի հիմնական նպատակն է պաշտոնական Թեհրանից միջազգային դիտորդների մուտքի թույլտվություն ստանալ Պարչինի ռազմաբազայում տեսչական առաքելություն անցկացնելու համար։