Հոդվածում մատնանշված հանգամանքները չեն համապատասխանել իրականությանը

2012թ. մայիսի 6-ին Կոտայքի մարզի դատախազությունից ՀՀ ոստիկանության Նաիրիի բաժին ստացվել է «aravot.am» կայքում հրապարակված «Ականատես եղանք ուրիշի փոխարեն քվեարկության» վերտառությամբ հաղորդումն այն մասին, որ Կոտայքի մարզի թիվ 27/13 ընտրական տեղամասում քվեարկել են քաղաքացի Հրաչ Պողոսյանի փոխարեն:

Նախապատրաստված նյութերով պարզվել է, որ 2012թ. մայիսի 6-ին' ժամը 10:30-ի սահմաններում, Կոտայքի մարզի Զովունի գյուղի բնակիչ Հայկ Մինասյանը գնացել է թիվ 27/13 ընտրատեղամաս եւ մասնակցել ՀՀ ԱԺ ընտրություններին:

Ժամը 15:30-ին նույն ընտրատեղամաս է այցելել նաեւ Հրաչ Պողոսյանը, ով ընտրացուցակում ստորագրելու ժամանակ հայտնաբերել է, որ իր անվան դիմաց արդեն իսկ ստորագրել են: Վերջինս պարզաբանում է պահանջել հանձնաժողովի անդամներից: Ստուգման արդյունքում պարզվել է, որ ընտրացուցակներում 899-րդ հերթական համարի տակ գրանցված Հայկ Մինասյանը սխալմամբ ստորագրել է նույն ընտրացուցակի 900-րդ համարի տակ ընդգրկված Հրաչ Պողոսյանի անվան դիմաց:

Ընտրատեղամաս է հրավիրվել Հայկ Մինասյանը, ով հաստատել է ընտրացուցակում Հրաչ Պողոսյանի անվան դիմաց սխալմամբ ստորագրելու հանգամանքը: Ընտրացուցակում ճշտումներ եւ այդ մասին նշումներ կատարելուց հետո Հրաչ Պողոսյանը մասնակցել է քվեարկությանը:

27/13 ընտրատեղամասի հանձնաժողովի անդամ, ՀԱԿ-ի ներկայացուցիչ Քերոբ Դավթյանն իր բացատրության մեջ նշել է, որ թե Հայկ Մինասյանի եւ թե Հրաչ Պողոսյանի քվերակելու ժամանակ ցուցակներում նշումներն ինքն է կատարել, տեղի ունեցածը թյուրիմացություն է, որն էլ տեղում շտկվել է:

Նույնաբովանդակ բացատրություններ են տվել նաեւ Հայկ Մինասյանը, 27/13 ընտրատեղամասի հանձնաժողովի անդամ Արարատ Արշակյանը, նույն հանձնաժողովի նախագահ Արշակ Պետրոսյանը եւ ԲՀԿ-ի ներկայացուցիչ Հայկ Ալեքսանյանը, ով հայտնել է, որ ընտրակեղծիքներ տեղի չեն ունեցել, ինքը որեւէ լրատվամիջոցի' այդ թվում նաեւ «aravot.am» կայքին հաղորդագրություն չի տվել:
Հրաչ Պողոսյանը հայտնել է, որ իր ընտրական իրավունքը չի խախտվել, կեղծիքներ չեն եղել, տեղի ունեցածը շփոթմունք է, որն էլ տեղում շտկվել է:

«aravot.am» կայքում հրապարակված «Ականատես եղանք ուրիշի փոխարեն քվեարկության» վերտառությամբ հաղորդման վերաբերյալ նախապատրաստված նյութերով քրեական գործի հարուցումը մերժվել է' հանցագործության դեպքի բացակայության պատճառաբանությամբ: