Պուտինի և Էրդողանի դեմ առ դեմ հանդիպումը տևել է երկու ժամ

Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի՝ ռուսական խոցված ինքնաթիռի պատճառով երկկողմանի հարաբերություններում ճգնաժամից հետո առաջին հանդիպման ժամանակ բանակցությունները տևել է 2 ժամ: Նախագահների առանձնազրույցին նախորդել են ընդլայնված կազմով բանակցությունները:
Այս մասին հայտնում է «Ռիա Նովոստի» գործակալությունը:

Թուրքական պատվիրակության կազմում են փոխվարչապետ Մեհմեթ Շիմշեքը, ԱԳՆ ղեկավար Մևլութ Չավուշօղլուն, էկոնոմիկայի նախարար Նիհաթ Զեյբեքչին, էներգետիկայի նախարար Բերաթ Ալբայրաքը, ազգային հետախուզական կազմակերպության ղեկավար Հաքան Ֆիդանը: Հանդիպմանը նաև մասնակցում են Թուրքիայի գյուղատնտեսության, մշակույթի և զբոսաշրջության, տրանսպորտի նախարարները, Մոսկվայում Թուրքիայի դեսպանը, Թուրքիայի իշխող «Արդարություն և զարգացում» կուսակցության փոխնախագահը և պաշտպանական արդյունաբերության գծով քարտուղարը:

Ռուս-թուրքական բանակցությունները շարունակվում են Սանկտ-Պետերբուրգի Կոնստանտինովյան պալատի հունական հյուրասենյակում:

Բանակցությունների մեկնարկից առաջ Էրդողանը լրագրողներին հայտնել է, որ Ռուսաստանի հետ համագործակցությունն ընդլայնելու հույս ունի:

ՌԴ-ի և Թուրքիայի միջև հարաբերությունները հայտնվել էին ճգնաժամում այն բանից հետո, երբ 2015 թվականի նոյեմբերի 24-ին թուրքական F-16 կործանիչը Սիրիայում խոցել է ռուսաստանյան Սու-24 ռմբակոծիչին: ՌԴ նախագահ Վլադիմիր Պուտինը դա անվանել էր ահաբեկիչների հանցակիցների կողմից «հարված թիկունքից»: Միջադեպից հետո ՌԴ նախագահը հրամանագիր էր ստորագրել ազգային անվտանգության ապահովման գծով միջոցառումների և Թուրքիայի նկատմամբ հատուկ տնտեսական միջոցառումների մասին:

Ռուսաստանի ղեկավարները հայտարարել էին, որ թուրք-ռուսական հարաբերությունները վերականգնելու մասին հնարավոր կլինի խոսել միայն այն բանից հետո, եթե Թուրքիայի ներկայիս ղեկավարությունը պաշտոնապես ներողություն խնդրի Մոսկվայից և փոխհատուցի խոցված ռուսաստանյան ինքնաթիռի և ուղղաթիռի անձնակազմերի ընտանիքներին:

Ռուսաստանյան ԶԼՄ-ներն ավելի վաղ հայտնել էին, որ Ռուսաստանի Դաշնության նախագահի մամուլի քարտուղար Դմիտրի Պեսկովը հայտնել է, որ Վլադիմիր Պուտինը Թուրքիայի նախագահ Ռեջեփ Թայիփ Էրդողանից ուղերձ է ստացել, որում նա ներողություն է խնդրել թուրքական օդուժի կողմից ռուսաստանյան Սու-24 ռմբակոծիչի խոցվելու և օդաչուի զոհվելու համար: