11 երեխա է զոհվել Բաղդադի հիվանդանոցներից մեկում բռնկված հրդեհի հետևանքով

Ուժգին հրդեհ է բռնկվել Իրաքի մայրաքաղաքի հիվանդանոցներից մեկում: Ինչպես հայտնել է արաբական այդ երկրի առողջապահության նախարարության պաշտոնական ներկայացուցիչ Ահմեդ ար Ռադինին, զոհվել է 11 երեխա:

«Բռնկումը տեղի է ունեցել այսօր առավոտյան Բաղդադի «Ալ Յարմուկ» հիվանդանոցի կանանց բաժանմունքներից մեկում»,- մամուլի քարտուղարի խոսքը մեջբերել է «Ալ Սումարիա» արբանյակային հեռուստաալիքը: Այն նաև հայտնել է, որ 29 հիվանդների եւ յոթ երեխաների տեղափոխել են բժշկական այլ հաստատություններ:

Ար Ռադինին նշել է, որ «քաղաքացիական պաշտպանության ուժերին հաջողվել է մարել հրդեհը»: Նա հավելել է, որ, նախնական հետաքննության համաձայն, բռնկման պատճառ է դարձել էլեկտրահաղորդալարերի անսարք ցանցը, հաղորդել է ՏԱՍՍ-ը: